Գլխավոր Լուրեր ԱԻՆ — «JICA» համագործակցությունը շարունակվում է. ԱԻՆ

ԱԻՆ — «JICA» համագործակցությունը շարունակվում է. ԱԻՆ

11
0

Արտակարգ իրավիճակների նախարարությունը և Ճապոնիայի միջազգային համագործակցության գործակալությունը նոյեմբերի 14-ին հրավիրեցին Հայաստանի Հանրապետությունում «Աղետների ռիսկի կառավարման նպատակով ճգնաժամային հաղորդակցության և հանրային իրազեկման բարելավման» ծրագրի միասնական համակարգող հանձնաժողովի երկրորդ նիստը:

Նախօրեին ԱԻ նախարարի տեղակալ Արկադի Բալյանը և ԱԻ նախարարի մամուլի քարտուղար Էդմոն Զարգարյանը հյուրընկալեցին Ճապոնիայի միջազգային համագործակցության գործակալության (JICA) Ուզբեկստանի և Վրաստանի գրասենյակի ներկայացուցիչներին և ծրագրի փորձագետների պատվիրակությանը: Հանդիպման ընթացքում խոսեցին կատարած աշխատանքների մասին, և պայմանավորվածություն ձեռք բերվեց միասնական համակարգող հանձնաժողովի երկրորդ նիստը հրավիրել սույն թվականի նոյեմբերի 14-ին:

Բացման խոսքով հանդես եկավ ԱԻ փոխնախարար Արկադի Բալյանը՝ հույս հայտնելով, որ արդյունավետ համագործակցությունն այսուհետ ևս կշարունակվի:

Այնուհետև Ուզբեկստանի գրասենյակի ներկայացուցիչ Շուն Օմորին ներկայացրեց Ճապոնիայի միջազգային համագործակցության գործակալության և կոնկրետ «Աղետների ռիսկի նվազեցման նպատակով ճգնաժամային հաղորդակցության և հանրային իրազեկման բարելավման» ծրագրի ընդհանուր նկարագիրը:

ՃՄՀԳ փորձագիտական խմբի գլխավոր խորհրդատու Կոիչի Շիվակուն ամփոփ ներկայացրեց առաջին փուլի ընթացքում կատարած աշխատանքների վերաբերյալ հաշվետվությունը և ԱԻ նախարարության դիտողություններն ու առաջարկությունները: Կոիչի Շիվակուն շնորհակալություն հայտնեց ԱԻ նախարարությանը և հատկապես տեղեկատվության և հասարակայնության հետ կապերի վարչությանը սերտ համագործակցության և առաջին փուլի աշխատանքները հաջողությամբ իրականացնելու համար:

Հստակեցվեց 2020 թ. փետրվար ամսին ճապոնիայում կայանալիք դասընթացի ժամկետը:

Ձեռք բերվեց պայմանավորվածություն փոփոխություններ կատարել նախասահմանված օրակարգում և ԱԻՆ ՏՀԿ վարչության կազմում ստեղծել լրատվական կենտրոն, որը կապահովի ԶԼՄ-ների հետ շուրջօրյա օպերատիվ հաղորդակցություն: Ճապոնական կողմը նախնական պայմանավորվածությամբ կարող է ապահովել տեխնիկական հագեցվածություն:

Այդ մասին տեղեկացնում է ՀՀ արտակարգ իրավիճակների նախարարության պաշտոնական կայքէջը: