Գլխավոր Լուրեր Հայաստանի և Իսրայելի ՏՏ ընկերությունների միջև կստեղծվի համագործակցության նոր կամուրջ

Հայաստանի և Իսրայելի ՏՏ ընկերությունների միջև կստեղծվի համագործակցության նոր կամուրջ

12
0

Հայաստանում անցկացված WCIT 2019-ի շրջանակում Հայաստանի և այլ երկրների տեղեկատվական տեխնոլոգիաների ոլորտի ընկերությունների համագործակցության հեռանկարներն արդեն դառնում են տեսանելի: Աշխարհի ավելի քան 50 երկրներում գրասենյակներ ունեցող TAITRA-ն՝ Թայբեյի արտաքին առևտրի զարգացման խորհուրդը ներկայացուցչություն է բացում Հայաստանում՝ կապելով Հայաստանի և Իսրայելի ՏՏ ոլորտի ընկերություններին: Այս մասին ասել է Առաջատար տեխնոլոգիաների ձեռնարկությունների միության նախագահ Ալեքսանդր Եսայանը:

Ինչպես գրում է  «Արմենպրես»-ը «WCIT-ի շրջանակում Հայաստանում էր նաև TAITRA-ի ղեկավարը Ջեյմս Ուանգը: Եվ մենք դեռ այդ օրերին քննարկեցինք Հայաստանում TAITRA-ի գրասենյակի հնարավոր բացման հարցը: Այն խթանում է ասիական ընկերությունների մուտքը միջազգային շուկաներ և հակառակ ուղղությամբ: Դա նաև համագործակցության հարթակ է բիզնեսի համար: Ընկերությունը, տեսնելով Հայաստանի և Իսրայելի ՏՏ ընկերությունների ձեռներեցությունը, նմանություններ է գտել նրանց միջև, և որոշում կայացրել գրասենյակ բացել նաև Հայաստանում, որը կաշխատի հենց երկու ամիս առաջ բացված Իսրայելի գրասենյակի հետ»,-ասաց Եսայանը:

Իսրայելը համարվում է նաև ստարտափերի երկիր, աշխարհում առաջատար դիրք է գրավում ստարտափերի թե քանակով, թե որակով: Հայաստանում ներկայացուցչություն ունենալը հնարավորություն կտա գրասենյակի հետ համագործակցելով ոչ միայն ծանոթանալ իսրայելական ընկերությունների հետ և համատեղ արտադրանք ստեղծել, այլ նաև այն Հայաստանի համար ուղիղ պատուհան կբացի՝ դեպի ասիական շուկա: Հայաստանում ՏՏ ոլորտի այն ընկերությունները, որոնք ունեն նորարական գաղափարներ և ցանկանում են արտադրություն կազմակերպել, այժմ հաճախ ստիպված են լինում իրենք չարչարվել, փնտրել, գտնել ընկերությունների, որոնք դրանով զբաղվում են: Իսկ TAITRA-ի ներկայության պարագայում ընկերությունները կարող են միանգամից դիմել դրան, որն իր բազայից կներկայացնի ընկերություններին: Այսինքն` հայաստանյան ընկերությունների համար հնարավորություն է ընձեռվում մի քանի ամսվա աշխատանքը կրճատել, բացի այդ իմանալ, որ վստահելի, որակյալ ընկերության հետ են աշխատելու: ԱՏՁՄ անդամ բոլոր ընկերությունները կունենան այդ հարթակից օգտվելու հնարավորություն:

TAITRA-ն Հայաստանում կլինի 2020 թվականի առաջին կիսամյակի ընթացքում: TAITRA-ն ներառում է տարեկան մոտ 600 մլրդ դոլար շրջանառությամբ ընկերություններ: 1970-ին հիմնադրված այդ ոչ առևտրային կազմակերպությունն ունի 63 արտասահմանյան մասնաճյուղ: