Ադրբեջանի արտաքին գործերի նախարարության մամուլի քարտուղար Լեյլա Աբդուլաևան մեկնաբանել  է Հայաստանի առաջին տիկին Աննա Հակոբյանի՝ «Կանայք հանուն խաղաղության» քարոզարշավի շրջանակներում ռուսաստանցի ազդեցիկ կանանց առաջիկա այցը Արցախ:

«Ես որպես կին և մայր կարող եմ հասկանալ Հայաստանի վարչապետի տիկնոջ կողմից  այս նախաձեռնությամբ հանդես գալը՝ ելնելով մարդասիրական սկզբունքներից: Գլխավոր նպատակը իբր երիտասարդ զինվորների մահը կանխելն է: Հակոբյանը սխալ է ընտրել իր  մարդասիրական առաքելության համար նպատակները, քանի  որ երիտասարդ մարդկանց մահը կանխելու համար նա, նախևառաջ, պետք է Հայաստանին կոչ անի դադարեցնել Ադրբեջանի հողերի «օկուպացիան»»,- Աբդուլաևայի խոսքը մեջբերում է «Ինտերֆաքս-Ազերբայջան»-ը:

Ադրբեջանի ԱԳՆ-ի մամուլի  քարտուղարը նաև նշել  է, որ ռուսաստանցի  կանանց այցի  նպատակը Հայաստանի  ձգտումն է՝ դրդել ռուսաստանցի կանանց այցելել «Ադրբեջանի  օկուպացված տարածքներ», ինչը, իբր, չի համապատասխանում Դուշանբեում Հայաստանի վարչապետի և Ադրբեջանի նախագահի միջև ձեռք բերված պայմանավորվածություններին: Նա հավելել է, որ Բաքուն այս հարցով խորհրդատվություն կանցկացնի Ռուսաստանի ԱԳՆ-ի հետ: