Երեքշաբթի , 22 Օգոստոս 2017

  •  USD   Առք` 476.50   Վաճառք` 480.00   ՀՀ ԿԲ` 478.57   
  •  EUR   Առք` 558.00   Վաճառք` 566.00   ՀՀ ԿԲ` 561.79   
  •  CHF   Առք` 481.00   Վաճառք` 498.00   ՀՀ ԿԲ` 497.63   
  •  GBP   Առք` 605.00   Վաճառք` 623.00   ՀՀ ԿԲ` 616.73   
  •  RUB   Առք` 8.03   Վաճառք` 8.20   ՀՀ ԿԲ` 8.05   
  •  GEL   Առք` 192.00   Վաճառք` 205.00   ՀՀ ԿԲ` 200.24   
outputra5huxgif
Clear
21°
Home » Լուրեր » Բժշկական քոլեջում բացակայությունների համար գումար են պահանջում. ահազանգում է ուսանողը

Բժշկական քոլեջում բացակայությունների համար գումար են պահանջում. ահազանգում է ուսանողը

Մարտ 20, 2017 16:43 Լուրեր, Հասարակություն A+ / A-

korupcia2

Երևանի պետական հենակետային բժշկական քոլեջում բացակայությունների համար ուսանողներից գումար են պահանջում՝ մեկ ժամվա համար 400 դրամ: Այս մասին araratnews.am-ին պատմեց խմբագրություն ահազանգած բժշկական քոլեջի ուսանող Տիգրան Կիրիշչյանը. «Ժամը 400 դրամով ամբողջ մեկ օրվա բացակայությունը կազմում է մոտ 3200-4000 դրամ: Ժամանակ է տրվում, եթե այդ ընթացքում չես մուծում, այն կրկնապատկվում է, նորից չմուծելու դեպքում` դրվում է քոլեջից հեռացնելու խնդիրը»:

Տիգրանին մեկ անգամ արդեն քոլեջից հեռացրել են բացակայությունների համար չվճարելու պատճառով, սակայն վերականգնվելուց հետո բացակայությունների պարտքի պատճառով  ուսանողին նորից սպառնում են հեռացնել քոլեջից: «Ինձ 2016 թվականի մարտի վերջին՝ երրորդ կուրսի երկրորդ կիսամյակից, արդեն մեկ անգամ դուրս են հանել բացակայությունների համար գումար չվճարելու պատճառով: Հետո գնացի, որ վերականգնեմ, ասացին` դժվար կարողանանք վերականգնել, բայց վերականգնեցին, որից հետո էլ ուրիշ հարցեր դրեցին, որ սրանից հետո պետք է տեսախցիկների մոտ չերևամ, ցույցերի չգնամ, թե չէ նորից կարող են հեռացնել: Իսկ ես տարբեր բողոքի ակցիաների եմ մասնակցում, մեկը հենց Հաց Բերողի հիշատակին նվիրված ցույցին»,- նշեց Տիգրանը և հավելեց, որ իր տեղեկություններով՝ քոլեջի տնօրեն Մկրտիչ Մկրտչյանը հանրապետական է:

Այս անգամ բացակայությունների համար նա պետք է վճարի ավելի  քան 20 հազար դրամ. «Դե, դասերի գնալու համար պետք է մուծել, բայց ես միտք չունեմ վճարելու, որովհետև, ինչքան գիտեմ՝ դա անօրինական է: Գումարը մուծում ենք դրամարկղում, որի համար ուղղակի կտրոն են տալիս, որը պետք է ներկայացվի բաժնի վարիչին»:

Մեր ճշտող հարցին՝ ՀԴՄ կտրո՞ն են տալիս, Տիգրանը պատասխանեց. «Չէ, դա ուղղակի թղթի կտոր է, որ բաժնի վարիչը տեսնի՝ գումարը մուծել ես»:

Բժշկական քոլեջի ուսանողը նաև ասաց, որ քոլեջում ոչ միայն գումար են պահանջում բացակայությունների համար, այլ նաև կաշառք են ուզում քոլեջ ընդունելու կամ քննությունները նշանակելու համար. «Մեզ մոտ կաշառակերությունն է շատ ստուգարքների, քննությունների ժամանակ: Ժամանակ է եղել, որ գումար չեն վերցրել, բայց ինչ-որ բան են ուզել: Օրինակ՝ ինձ հետ դեպք է եղել, որ ասել են՝ «Մերսի» բոմբոներկա բեր»:

Իսկ ընդունելության համար, Տիգրանի խոսքով՝ մոտ 700 դոլար են պահանջում. «Մարդ կա, որ իր ուժերով է ընդունվում, բայց դա շատ հազվադեպ է լինում, իսկ ընդունվելու համար, եթե չեմ սխալվում, 700 դոլար են ուզում: Ես իմ ուժերով եմ ընդունվել, բայց ընկերներս, ովքեր ընդունվել են, գումար են տվել»:

Ահազանգի վերաբերյալ մենք փորձեցինք կապ հաստատել Երևանի պետական հենակետային բժշկական քոլեջի տնօրեն Մկրտիչ Մկրտչյանի հետ, սակայն նա աշխատավայրում չէր: Փոխարենը խոսեցինք քոլեջի փոխտնօրեն Նաիրա Ներսիսյանի հետ, ով չհերքեց, որ բացակայությունների համար գումար են վերցնում:

«Մենք միայն անհարգելի բացակայությունների ժամանակ ենք վերցնում, իսկ հարգելի բացակայությունների ժամանակ, երբ համապատասխան տեղեկանք է լինում ուսանողի հիվանդության, հաշմանդամության կամ հիվանդ ծնողի խնամքի մասին, նման դեպքերում գումար չենք վերցնում»,- նշեց փոխտնօրենը

Նրա պնդմամբ՝ անհարգելի բացակայությունների համար վճարն օրինական է, որը սահմանվում է ըստ քոլեջի կանոնակարգի, որը հաստատված է քոլեջի կառավարման խորհրդի կողմից:

Այլ հարցերի տիկին Ներսիսյանը պատասխանել չցանկացավ, նշելով, որ այլ հարցերի համար պետք է անձամբ այցելենք իրենց:

ՀՀ կրթության և գիտության նախարարության մասնագիտական կրթության և ուսուցման բաժնի պետ Կարեն Մանուկյանն էլ araratnews.am-ին տեղեկացրեց, որ քոլեջները բացակայությունների համար  գումար վերցնելու իրավունք չունեն:

Հիշեցնենք, որ araratnews.am-ը մոտ երեք տարի առաջ Երևանի պետական հենակետային բժշկական քոլեջի հետ կապված ևս մեկ կոռուպցիոն բացահայտում էր արել, որից պարզվել էր, որ ընդունելության համար գումար են պահանջում: Հետագայում, սակայն, գործը կարճվեց` հանցակազմի բացակայության հիմքով:

Էմմա Հովսեփյան

122488199673267500288781848048447njpg
scroll to top