Գլխավոր Իրավական Դպրոցի մարզադաշտի տակ առանց թույլտվության ավտոկայանատեղի է կառուցվել

Դպրոցի մարզադաշտի տակ առանց թույլտվության ավտոկայանատեղի է կառուցվել

2
0

Կոմիտասի 15 հասցեում կառուցված բազմաբնակարան շենքն ամիսներ առաջ Արաբկիր վարչական շրջանի աշխատակազմի ուշադրության կենտրոնում հայտնվեց հաստատված նախագծից ակնհայտ շեղումների պատճառով: Կառուցապատողը զավթել էր հարակից համայնքային հողատարածքները, այդ թվում՝ մայթը:

Այս մասին հաղորդագրություն է տարածել Երեւանի քաղաքապետարանը, որն էլ ներկայացնում ենք ստորեւ.

«Տարբեր իրավախախտումների համար տվյալ կառուցապատողը 3 անգամ տուգանվել է մինչեւ 2.5 մլն դրամի չափով»,- ասում է Արաբկիր վարչական շրջանի ղեկավարի տեղակալ Արսեն Ղեւոնդյանը:

Դեռ այն ժամանակ կառուցապատողը պարտավորվեց սեփական ուժերով վերացնել թերություները: Աշխատանքները սկսվեցին, բայց անավարտ մնացին: Ավելին՝ տնտեսվարողը փորձում էր ընդլայնել իր գործունեությունը մայթի հաշվին: Քաղաքապետարանը ստիպված էր քայլեր ձեռնարկել սեփական միջոցներով:
«Մայթը նեղանում էր նախնական նախագծից եւս 3 մետրով եւ ինչի՞ համար, որ դիմացի մի քանի տնտեսվարողների համար ստեղծվեն ավելի հարմարավետ պայմաններ: Մենք ստիպված եղանք որոշում կայացնել եւ սկսեցինք զավթած տարածքը վերադարձնել, ապամոնտաժել երկաթե կոնստրուկցիաները եւ ազատել մոտ 3 մետր հատվածը, որը շուտով կբարեկարգենք»,-ընդգծում է Արաբկիր վարչական շրջանի ղեկավար Արամ Դանիելյանը:
Առաջիկայում Երեւան համայնքը դատական կարգով կառուցապատողից հետ կգանձի քանդման եւ բարեկարգման գումարները:

Արտաքնապես երեւացող այս խնդիրների կողքին Կոմիտասի 15 շենքում բացահայտվեց եւս մեկ՝ այս անգամ խոշոր խախտում: Նույն կառուցապատողը շենքը սահմանազատող պարսպի ետեւում՝ դպրոցի մարզադաշտի տակ, առանց որեւէ իրավական հիմքի երկհարկանի ավտոկայանատեղի է կառուցվել:
Դպրոցի աշխատակիցները շինարարության ընթացքին հետեւել են, նկատել, որ ինչ-որ բան այն չէ, սակայն մանրամասներին չեն տիրապետում:

«Արդեն իսկ նկատելի է, որ մարզադաշտն իր իրական չափերից ավելի փոքր է: Բացի այդ, մեր բակային տարածքն էլ նորակառույց շենքի աշխատակիցների կողմից օգտագործվում է որպես ավտոկայանատեղի»,- պատմում է դպրոցի տնտեսվար Ռոբերտ Աթաբեկյանը:
Օրերս քաղաքապետարանը ոստիկանությունից գրություն ստացավ այն մասին, որ Կոմիտասի պողոտայի 15 եւ 15/5 հասցեներում կառուցված բազմաֆունկցիոնալ համալիր կառուցելու համար ձեւակերպված ավարտական ակտի ոչ իրավաչափ լինելու կասկածով (ՀՀ Քր. օր. 308-ի 1-ին մաս) հարուցվել է քրեական գործ: Մանրամասները կպարզի նախաքննությունը:

«Քանի որ դպրոցը գտնվում է պետական գույքի կառավարման կոմիտեի հաշվեկշռում, նրանք կպատվիրեն չափագրումներ եւ կհստակեցվի ապօրինի տնօրինվող տարածքների իրական ծավալները: Հետագայում տարածքը կանցնի կոմիտեի հաշվեկշիռ, որից հետո միայն պարզ կլինի, թե ինչպե՞ս կտնօրինվի այն»,-նշում է վարչական շրջանի ղեկավարի տեղակալ Արսեն Ղեւոնդյանը:
«Երկու ձեռքով պատրաստ եմ աջակցել օրինական շինարարություն իրականացնողներին եւ կառուցապատողներին: Ներդրումների նկատմամբ բաց ենք եւ անելու ենք ամեն ինչ, որպեսզի զարկ տանք, սակայն, միայն օրենքի շրջանակում»,-նկատում է Արաբկիր վարչական շրջանի ղեկավարը:
Այսօր Արաբկիրում շինարարական ամեն մի աշխատանք առանձին է հսկվում: Բացի այդ, շրջանի աշխատակազմը քայլեր է ձեռնարկում զավթած հանրային այլ տարածքները, հատկապես մայթերը բնակիչներին վերադարձնելու նպատակով:

Հաջորդ հասցեն հենց վարչական շրջանի շենքի հարակից այգին է: Այստեղ խնդիրը փոքր-ինչ այլ է:
«Թվով 10 տարածքներ տրամադրված են տարբեր տնտեսվարողների, եւ այդ 10 տարածքները գրեթե առանց բացառության չեն համապատասխանում փաստացի զբաղեցրած տարածքների չափերին: Կան անգամ տարածքներ, որ գերազանցում են նախատեսվածը մոտ 8 անգամ: Օրինակ, պայմանագրում նշված է 100-110 քմ, սակայն փաստացի չափագրումը ցույց է տալիս 800-900մ»,-նշում է Արամ Դանիելյանը:

Քաղաքային իշխանությունը մտադիր է նաեւ վերանայել հանգստի գոտիներում վարձակալությամբ տրամադրված տարածքների չափերը: «Հավասար պայմաններ՝ բոլորի համար» սկզբունքով էլ տարածքները կդրվեն վարձակալության թափանցիկ եւ մրցունակ աճուրդների՝ դրանց շուկայական արժեքներին համապատասխան»: