Գլխավոր Լուրեր Գորայքի բնակիչները փակել են Երևան-Մեղրի ճանապարհը

Գորայքի բնակիչները փակել են Երևան-Մեղրի ճանապարհը

2
0

Սյունիքի մարզի Գորայք խոշորացված համայնքի Ծղուկ բնակավայրի բնակիչներն այս պահին բողոքի ակցիա են իրականացնում: Փակել են Երևան-Մեղրի տանող միջպետական ճանապարհը՝ պահանջելով, որ այնտեղ գնան ՀՀ վարչապետ Նիկոլ Փաշինյանը կամ ԱԱԾ տնօրեն Արթուր Վանեցյանը:

Խնդիրը Վարչական դատարանի կողմից հունիսի 8-ին Սյունիքի Գորայք համայնքում տեղի ունեցած արտահերթ ՏԻՄ ընտրությունների արդյունքների անվավեր ճանաչելն է։

Կենտրոնական ընտրական հանձնաժողովի հրապարակած նախնական տվյալների համաձայն՝ 1408 ընտրողից քվեարկությանը մասնակցել է 1071 հոգի: Նախնական արդյունքներով՝ համայնքի ղեկավարի ընտրությանը գրանցվել է ձայների բաշխման հետեւյալ պատկերը՝ Աշոտ Աղաջանյան 531 քվե, Արտյոմ Գրիգորյան 515 քվե, Մանուչար Մկրտչյան 13 քվե: Թեկնածուներից Արտյոմ Գրիգորյանը դատարանում վիճարկել է ընտրությունների արդյունքները եւ դատարանը որոշում է կայացրել հունիսի 30-ին նոր ընտրություններ անցկացնել:

Ճանապարհը փակողները պնդում են, որ դատարանն ապօրինի որոշում է կայացրել` անվավեր ճանաչելով թիվ 34 տարածքային ընտրական հանձնաժողովի որոշումը։

Բնակիչները պահանջում են կամ վարչապետին կամ ԱԱԾ տնօրենին։