Ուրբաթ , 14 Դեկտեմբեր 2018

    outputra5huxgif
    Partly Cloudy
    Home » Լուրեր » Հարցազրույց պատգամավորի թեկնածուի հետ. Հայկ Գրիգորյան

    Հարցազրույց պատգամավորի թեկնածուի հետ. Հայկ Գրիգորյան

    Հարցազրույց պատգամավորի թեկնածուի հետ. Հայկ Գրիգորյան
    Դեկտեմբեր 6, 2018 17:29 Լուրեր, Հարցազրույց պատգամավորի թեկնածուի հետ A+ / A-

    AraratNews.am-ի զրուցակիցն է «Ազգային առաջընթաց» կուսակցության պատգամավորի թեկնածու Հայկ Գրիգորյանը:

    Երևան Տոնավաճառ

    Պարո՛ն Գրիգորյան,   ԱԺ արտահերթ ընտրության նախընտրական քարոզարշավը 2 օրից կավարտվի: Ինչպե՞ս եք գնահատում քարոզարշավը:

    Նորմալ ենք գնահատում: Եղել ենք մարզերում,  համայնքներում: Կլինենք նաև  Մալաթիայում, Էրեբունիում:

    Նախընտրական քարոզարշավում  բովանդակային  պայքար եղա՞վ:

    Երեկվա բանավեճը լավն էր: Էլի 100 տոկոս բովանդակային չէր, բայց նորմալ էր: Որտեղ որ ՀՀԿ-ը, ՀՅԴ-ն, ՕԵԿ-ը չկային, նոր ուժերի միջեւ եղավ որակական քննարկում:

    Առաձնացրե՛ք երեք խնդիր, որոնք եղել են Ձեր ուշադրության կենտրոնում նախընտրական քարոզարշավում: 

    Բանկային համակարգի բարեփոխում՝ վարկերի, տոկոսադրույքների իջեցում, հատկապես գյուղատնտեսական վարկերի, միջին ու փոքր բիզնեսի, նորաստեղծ ընտանիքների վարկերի տոկոսադրույքների իջեցում: Երկրորդ՝ պատգամավորի անձեռնմխելիության վերացումը: Երրորդը՝ տնտեսության զարգացման մեր մոտեցումը: Վարկային միջոցները պետք է հասանելի լինեն բոլորին:

    Նախընտրական քարոզարշավում հանդե՞ս եք գալիս գործող կառավարությանն ընդդիմադի՞ր, թե՞ իշխանամետ ուժ:

    Որոշ հարցերում՝ Ընտրական օրենսգրքի փոփոխություն, թալանի հետ վերադարձ,  կարծում ենք, իրավիճակը կլիներ ուրիշ, եթե մենք լինեինք իշխանություն:

    Բայց երեկվա բանավեճում Ձեր ցուցակի առաջին համարը՝ Լուսինե Հարոյանը, հանդես էր գալիս գործող կառավարությանն աջակից: Ընդդիմադիր ուժ միայն ՀՀԿ-ն է: Հետեւաբար, ինչո՞ւ պետք է  քաղաքացիներն ընտրեն Ձեզ՝ «Իմ քայլը» դաշինքի փոխարեն:

    ՀՀԿ-ն  ընդդիմադիր չէ: Նա արհեստական ստեղծում է ընդդիմադրի արհեստական քող: Բանավեճին ՀՀԿ-ը խանգարում է իր լեզվակռվով: Մենք սոցիալական ուղղվածության ուժ ենք, Փաշինյանը՝ լիբերալ ուժ է: Ով մեզ է քվե տալու, քվե չի տա Փաշինյանին եւ հակառակը:

    Ըստ «Գելափի» հարցումների՝ Ձեր քաղաքական ուժն անգամ 1 տոկոսի շեմը չի հաղթահարի: 

    Դա կեղծ «Գելափն» է, որի 2 տարի առաջվա տվյալներով ՀՀԿ-ն 70 տոկոս  ձայն ուներ: Մենք համարում ենք  նախկին համակարգի տակ գտնվող կազմակերպություն: Անգամ հիմա են ասում, որ ՀՀԿ-ը 10 տոկոս ձայն է  հավաքելու, բայց մեր հանդիպումները ցույց են տալիս, որ  ՀՀԿ-ը ոչ մի ձայն  չունի: Իսկ մեր մասին՝ որպես ուժի, բավական տեղեկացվածություն կա:

    Վստա՞հ եք, որ 5 տոկոսի շեմը կհաղթահարե՞ք:

    Ես դա չասացի: Ասացի, որ «Գելափի»՝ 1 տոկոսի մասին տվյալներն իրական չեն: Մենք ունենք դրանից ավելի ձայն: Իսկ թե կոնկրետ ինչքա՛ն՝ քվեարկությունը ցույց կտա:

    Եթե  5 տոկոսի շեմը չհաղթահարեք, ակտիվ կլինե՞ք որպես արտախորհրդարանական ուժ:

    Այո՛, մեր ուժը կապ չունի Նիկոլ Փաշինյանի կառավարության հետ:

    Ձեր կուսակցության ծրագրում գրել եք. «ԶԼՄ-ները դուրս հանել կուսակցական-քաղաքական ազդեցությունների դաշտից՝ օրենսդրական լուծումներով: …Պետք է օրենքով արգելել կուսակցություններին՝ մասնաբաժին ունենալ լրատվական միջոցներում»: Ինչո՞ւ չպետք է կուսակցություններն իրենց գաղափարախոսությունը հանրությանը  ներկայացնելու ԶԼՄ չունենան:

    Եթե հեռուստակայանները որեւէ քաղաքական ուժինն են, նա սպասարկում է այդ ուժին: Օրինակ՝ 1in.am-ը, որը փոխկապակցված է «Լուսավոր Հայաստանի» հետ, մեզ չեն լուսաբանել, քանի որ այդ ուժին համարում ենք կեղծ ընդդիմություն: Լրագրությունը հանրային մասնագիտություն է, լրագրողն իր գումարը վաստակում է գովազդից, իր նյութի որակից: Լրատվականները պետք է լուսաբանեն բոլոր կուսակցություններին:

    Նախընտրական ծրագրի ձեր այս  կետը չի կիրառվում անգամ միջազգային ասպարեզում: ԱՄՆ-ում, օրինակ՝ կան ԱՄՆ նախագահ Դոնալդ Թրամփին քննադատող եւ չքննադատող լրատվամիջոցներ: 

    Բայց ո՞վ ասաց, որ ԱՄՆ-ի լրատվական դաշտն ազատ է եւ չկա բարեփոխումների կարիք: Նույնը մեր դաշտում է: Չկա այսօր լրատվական, որին կարող եմ հավատալ: Ամեն քաղաքացի ունի օբյեկտիվ տեղեկատվության հասանելիության իրավունք: Մենք ասում ենք՝ լրատվական  գործակալությունները պետք է մասնավորինը լինեն, որը չպետք է ունենա կուսակցական պատկանելություն:

    Բիզնեսմենը կարո՞ղ է սեփական լրատվամիջոց ունենալ:

    Եթե քաղաքական դեմքեր չեն, կարող են ունենալ: Մեզ անհայտ սուպերմարկետի տնօրենը կարող է ունենալ  լրատվամիջոց:

    Իսկ չե՞ք կարծում, որ անհայտ սուպերմարկետի տնօրենն իր քաղաքական շահերը կունենա եւ ստվերային կաջակցի այս կամ այն ուժի:

    Հնարավոր է, բայց  նա  առնվազն քաղաքական դեմք չի լինի:

    Բայց եթե մեր երկրի տնտեսական վիճակը բարվոք չէ, տնտեսավարողներից ոմանք ունեն հնարավորություն՝ լրատվամիջոցների հետ գովազդային համագործակցություն սկսելու, չե՞ք կարծում՝ դեռ շուտ է այսպիսի դրույթ սկսելը: 

    Ես հասկանում եմ: Նույն վիճակում է ամեն ինչ:  Բայց ԶԼՄ-ը քաղաքական համակարգի ու կուլտուրայի վրա մեծ ազդեցություն ունի:

    Սոնա Դավթյան


    Նման թեմաներ

    scroll to top