Ուրբաթ , 20 Հուլիս 2018

    outputra5huxgif
    Sunny
    31°
    Home » Լուրեր » Կոռուպցիոն երեւույթներ չեն եղել. կադրային փոփոխություններ ԱԺ-ում

    Կոռուպցիոն երեւույթներ չեն եղել. կադրային փոփոխություններ ԱԺ-ում

    Սեպտեմբեր 13, 2017 14:33 Լուրեր, Քաղաքական A+ / A-

    արա սաղաթելյան

    Լրատվամիջոցները շարունակում են խոշորացույցի տակ պահել Ազգային ժողովի աշխատակազմի ղեկավար Արա Սաղաթելյանի գործունեությունը: Նա սկսել է բարեփոխումներ խորհրդարանում, որոնք դրսեւորվում են նաև կադրային փոփոխություններով: Հերթը հիմա ԱԺ աշխատակազմի ֆինանսատնտեսական եւ հաշվապահական հաշվառման վարչությանն է: Տեղեկություններ կային, որ վերոնշյալ վարչությունում կոռուպցիոն երեւույթներ են հայտնաբերվել, որոնց պատճառով ԱԺ աշխատակազմի ղեկավարը հիմա աշխատակազմի ֆինանսատնտեսական եւ հաշվապահական հաշվառման վարչության պետ Վարդան Թորոսյանին նշանակել է պետի տեղակալ, իսկ վարչության պետ նշանակել է Արտաշես Բախշյանին:

    Araratnews.am-ի հետ զրույցում ԱԺ հասարակայնության հետ կապերի եւ լրատվության վարչության պետ Արսեն Բաբայանը հերքեց ԱԺ աշխատակազմում չարաշահումների, ատկատների, առավել եւս` կոռուպցիոն երեւույթների մասին լուրերը:

    Արսեն Բաբայանի տեղեկացմամբ` Արտաշես Բախշյանը սեպտեմբերի սկզբին է նշանակվել ԱԺ աշխատակազմի ֆինանսատնտեսական եւ հաշվապահական հաշվառման վարչության պետ, իսկ մինչև ԱԺ տեղափոխվելը աշխատել է տարածքային կառավարման և զարգացման նախարարությունում` որպես տարածքային ներդրումային քաղաքականության և գործառնական ծրագրերի վարչության պետ:

    Սպասելի՞ էր Վարդան Թորոսյանի համար պաշտոնի իջեցումը: «Դա ներքին խնդիր է: Մենք խոսել ենք… դա ո՛չ հոդվածի (նկատի ունի իր մասին երեկվա հրապարակվածը.-հեղ.), ո՛չ էլ Արա Սաղաթելյանի հետ կապ չունի»,- ասաց նա Araratnews.am-ի հետ զրույցում:

    Ինչ վերաբերում է իր պաշտոնավարման ժամանակ հայտնաբերված չարաշահումներին ու կոռուպցիոն երեւույթներին, Վարդան Թորոսյանը հերքեց այդ տեղեկությունները՝ դրանք հիմարություն համարելով: «Չեն եղել կոռուպցիոն երեւույթներ ու չէին էլ կարող լինել»,- հավաստիացրեց նա:

    Պետական ապարատում չգրված օրենք կա. եթե որեւէ գերատեսչությունում  պաշտոնի իջեցում է լինում, պաշտոնյան փոխում է աշխատանքի վայրը: Արդյոք Վարդան Թորոսյանը կփոխի՞ առաջիկայում իր աշխատավայրը: «Կյանքում երբեք ոչինչ չի բացառվում: Ոչ մեկս չգիտի, թե վաղն ինչ է լինելու մեզ հետ»,- ասաց ԱԺ աշխատակազմի ֆինանսատնտեսական եւ հաշվապահական հաշվառման վարչության պետի տեղակալը:

    ՍՈՆԱ ԴԱՎԹՅԱՆ

    Նման թեմաներ

    scroll to top