Գլխավոր Լուրեր Նոր զարգացումներ՝ մահացած ծննդկան Մերի Մարգարյանի գործով. տուժող կողմին չեն տեղեկացրել

Նոր զարգացումներ՝ մահացած ծննդկան Մերի Մարգարյանի գործով. տուժող կողմին չեն տեղեկացրել

148
0

Araratnews.am-ը  շարունակում է  հետեւել «Շենգավիթ» ԲԿ-ում ծննդկան Մերի Մարգարյանի մահվան փաստով հարուցված քրեական գործին:

Հիշեցնենք՝ Տիգրան Սարգսյանին մեղադրանք է առաջադրվել այն բանի համար, որ նա աշխատելով «Շենգավիթ» բժշկական կենտրոն ՓԲԸ-ում որպես մանկաբարձ-գինեկոլոգ, 2015 թ. հուլիսի 27-ին բժշկական օգնությունը և սպասարկումը կազմակերպելու ժամանակ, «Բնակչության բժշկական օգնության և սպասարկման մասին» ՀՀ օրենքի 19-րդ հոդվածի համաձայն՝ պարտավոր լինելով Մերի Մարգարյանին ցուցաբերել անհետաձգելի առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և հանգամանքների առկայությունից, ինչպես նաև ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև վերջինիս նորածնի մահը:

Արամ  Գրիգորյանին մեղադրանք է առաջադրվել այն բանի համար, որ նա, աշխատելով «Շենգավիթ» բժշկական կենտրոն ՓԲԸ-ում որպես անեսթեզիոլոգ-ռեանիմատոլոգ, 2015 թ. հուլիսի 27-ին բժշկական օգնությունը և սպասարկումը կազմակերպելու ժամանակ, «Բնակչության բժշկական օգնության և սպասարկման մասին» ՀՀ օրենքի 19-րդ հոդվածի համաձայն՝ պարտավոր լինելով Մերի Մարգարյանին ցուցաբերել անհետաձգելի առաջին բժշկական օգնություն` անկախ այդ օգնության դիմաց վարձատրությունը երաշխավորող հիմքերի և հանգամանքների առկայությունից, ինչպես նաև ապահովել ցուցաբերվող բժշկական օգնության և սպասարկման քանակական և որակական բնութագրիչների համապատասխանությունը սահմանված չափանիշներին, իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի` Մերի Մարգարյանի, այնուհետև վերջինիս նորածնի մահը:

Տեղեկացնենք, որ սույն դատական գործը քննվում է երկու մասով՝  Մերի Մարգարյանի մահվան համար մեղադրվող բժիշկներ Արամ Գրիգորյանի ու Տիգրան Սարգսյանի գործը քննում է դատավոր Մնացական Մարտիրոսյանը Երեւանի քաղաքի ընդհանուր իրավասության դատարանի Կենտրոնի եւ Նորք-Մարաշ նստավայրում: Իսկ Մերի Մարգարյանի անմիջական բժիշկներ Շուշանիկ Բախշյանի ու Անի Բաբելյանի գործը քննում է դատավոր Դավիթ Բալայանը

Մեզ հայտնի դարձավ, որ 2019 թ. մայիսի 30-ին՝ ժամը 16:30-ին, դատախազ Արթուր Սմբատյանը մեղադրական ճառն է ընթերցել դատարանում, սակայն տուժող կողմին դատական նիստի օրն ու ժամը չեն ծանուցել: Սա այն դեպքում, երբ բոլոր դատական նիստերին տուժող կողմը բարեխղճորեն մասնակցել է:

Մի քանի օր համառորեն փորձել ենք դատավոր Մնացական Մարտիրոսյանի  հետ կապ հաստատել, սակայն ապարդյուն: Դատարանի քաղաքային հեռախոսահամարին պատասխանած աշխատակիցը  տեղեկացրեց՝ դատավորը չի կարող լրագրողների հետ խոսել, հարցը պետք է ուղարկել գրավոր:

«Դատալեքսում» եւս որեւ տեղեկատվության այդ օրվա դատական նիստի մասին, բացի նիստի օրվանից ու ժամից, չկա:

Մերի Մարգարյանի գործով մեղադրող դատախազ Արթուր Սմբատյանն էլ մեզ հետ զրույցում ոչ մի բան չասաց, հորդորեց դիմել դատարան:

Araratnews.am-ի տեղեկություններով՝  դատախազը Մերի Մարգարյանի մահվան գործով պահանջել է բժիշկ Տիգրան Սարգսյանին ազատազրկել 4 տարով՝ համաներման կիրառմամբ,  3 տարի զրկել բժշկական գործունեությամբ զբաղվելու լիցենզիայից, Արամ Գրիգորյանին ազատազրկել 3.5 տարի՝ դարձյալ համաներման կիրառմամբ եւ 3 տարի զրկել բժշկական գործունեությամբ զբաղվելու լիցենզիայից:

Վերոնշյալ երկու բժիշկների անջատված մասի դատական հաջորդ նիստը նշանակված  է հունիսի 13-ին՝ ժամը 16:00-ին:

Հ.Գ. Մեր հրապարակումներից մեկում գրել էինք, որ Մերի Մարգարյանի գործով մեղադրվող բժիշկ Շուշանիկ Բախշյանի փեսան՝  Սերգեյ Մեղրյանը, Բարձրագույն դատական խորհրդի անդամ է: Տուժող կողմի իրավահաջորդ Վաղինակ Մարգարյանը մեզ հետ զրույցում այսօր վերահաստատեց իր մտավախությունը՝ Մեղրյանը փորձում է գործի քննությունը զոքանչի համար բարենպաստ ուղղությամբ տանել: Փորձեցինք նաև պարզաբանում լսել ԲԴԽ անդամ Սերգեյ Մեղրյանից, սակայն նրա հեռախոսահամարը անջատված էր:

Հիշեցնենք, որ Դավիթ Բալայանի նախագահությամբ 2018 թ.-ից նշանակվել է դատաբժշկական կրկնակի փորձաքննություն, քանի որ դատաքննության ժամանակ, ինչպես պաշտպանական, այնպես էլ մեղադրանքի կողմերը կարծիքներ են հայտնել հիշյալ փորձագիտական եզրակացության վերաբերյալ` կասկածի տակ դնելով թե դրա հիմնավորվածությունը, թե փորձաքննության կատարման դատավարական կանոնների խախտումը և թե փորձագետների անկողմնակալությունը:

Դատարանը, վերլուծելով դատաքննության և դատական վիճաբանությունները, կողմերի արտահայտած դիրքորոշումները, արձանագրում է՝ խախտվել են փորձաքննության կատարման դատավարական կանոնները, որը ՀՀ քրեական դատավարության օրենսգրքի 251-րդ հոդվածի 2-րդ կետի ուժով հիմք է կրկնակի փորձաքննություն կատարելու համար:

Սոնա Դավթյան