Գլխավոր Լուրեր Երևանի ավագանու անդամ Կարեն Անտաշյանը դադարեցրել է լիազորությունները

Երևանի ավագանու անդամ Կարեն Անտաշյանը դադարեցրել է լիազորությունները

1
0

Երևանի քաղաքապետ Հայկ Մարությանը որոշում է ստորագրել «Իմ քայլը» կուսակցությունների դաշինքի Երևան քաղաքի ընտրական ցուցակով ընտրված Երևան քաղաքի ավագանու անդամ Կարեն Անտաշյանի՝ ավագանու անդամի լիազորությունները դադարեցնելու մասին:

 Կարեն Անտաշյանը ֆեյսբուքյան իր էջում ավագանու անդամի լիազորությունները դադարեցնելու հետ կապված գրառում է կատարել.

«Սիրելի ընկերներ, ափսոսանքով հայտնում եմ Երևանի ավագանու իմ լիազորությունները դադարեցնելու որոշման մասին։ Որոշումն ինձ հեշտ չի տրվել, առնվազն մեկ ամիս անընդհատ երկմտանքի մեջ էի, մինչև վերջին պահը դիմադրում էի, բայց, ցավոք, իմ հիմնական աշխատանքային և հասարակական գործունեության մեջ զբաղվածության կտրուկ աճի պատճառով ավագանու կազմում իմ գործունեությունը պատշաճ մակարդակով իրականացնելն առաջիկայում հնարավոր չի լինելու։ Որոշակի պահի հասկացա, որ ավելի շատ մեկ ոլորտից մյուսին անցում կատարելու վրա եմ ժամանակ ու ջանք ծախսում, քան որևէ ոլորտում կոնկրետ գործ անելու, ավելի շատ գերհոգնում եմ, ժամանակ ու ջանք փոշիացնում, քան հավելյալ արժեք ստեղծում, ուստի ստիպված եմ կրճատել զբաղվածությունս, քանի որ ձևական ներկայություն չեմ ուզում պահել։

Այս ընթացքում հրաշալի մարդկանց հետ ծանոթացա, որ ամենամեծ ձեռքբերումն եմ համարում կյանքիս այս հատվածում։ Մարդիկ, որ անկախ ավագանու ինստիտուտի անկատարությունից, անկախ կառավարման համակարգի նախկին վատ իներցիաներից, իրոք,  ջանք ու եռանդ չեն խնայում հանրային բարիք ստեղծելու համար, ազնիվ, անկաշառ, նվիրված, շնորհքով, համեստ մարդիկ։ Նրանց՝
ավագանու իմ գործընկերներին Երևանի կառավարման դժվարին գործում տեսանելի արդյունքներ և հաջողություններ եմ մաղթում և հայտնում ուժերիս ներածի չափով քաղաքի խնդիրների լուծմանը մասնակցելու իմ պատրաստակամությունը իբրև ակտիվ քաղաքացի և սեփական նախագծերով»,-նշված է մեկնաբանության մեջ։