Գլխավոր Արցախ Ադրբեջանի պաշտպանության նախարարը մայիսի 4-ին եղել է շփման գծի հյուսիսարևելյան և արևելյան...

Ադրբեջանի պաշտպանության նախարարը մայիսի 4-ին եղել է շփման գծի հյուսիսարևելյան և արևելյան հատվածներում. ԱՀ ՊՆ

17
0

Արդեն մի քանի օր է, ինչ Ադրբեջանի ԶՈՒ ղեկավարությունը, մասնավորապես պաշտպանության նախարարը, պարբերաբար այցեր են կատարում առաջնագծի տարբեր հատվածներ: Ադրբեջանի պաշտպանության նախարարը մայիսի 4-ին ևս եղել է շփման գծի հյուսիսարևելյան և արևելյան հատվածներում, ինչն ամբողջությամբ դիտարկվել է ՊԲ համախատասխան ծառայությունների կողմից: Այս մասին տեղեկացնում է Արցախի Հանրապետության պաշտպանության նախարարությունը: Նախարարության կայքում հրապարակված հաղորդագրության մեջ ասված է. 

«Վերջին շաբաթներին արցախա-ադրբեջանական հակամարտ զորքերի շփման գծի տարբեր հատվածներում հակառակորդի կողմից նախաձեռնած հրադադարի ռեժիմի խախտման դեպքերին արցախյան բանակի տրված պատասխանները պաշտոնական Բաքվի ռազմաքաղաքական ղեկավարության համար կարծես թե բավականին ցավոտ էին: Ամենայն հավանականությամբ հենց դա է պատճառը, որ արդեն մի քանի օր է, ինչ Ադրբեջանի ԶՈՒ ղեկավարությունը և, մասնավորապես, պաշտպանության նախարարը պարբերաբար այցեր են կատարում առաջնագծի տարբեր հատվածներ՝ փորձելով ինչ-որ կերպ ոգևորել բարոյալքված և մարտունակությունը կորցրած իրենց զինծառայողներին: Ադրբեջանի պաշտպանության նախարարը նման այցով մայիսի 4-ին եղել է շփման գծի հյուսիսարևելյան և արևելյան հատվածներում, ինչն ամբողջությամբ դիտարկվել է ՊԲ համախատասխան ծառայությունների կողմից:

ԱՀ ԶՈՒ հրամանատարությունը հավատարիմ մնալով համավարակի պայմաններում հրադադարը պահպանելու մասին ՄԱԿ-ի Գլխավոր քարտուղարի հորդորից բխող պահանջներին, միաժամանակ տեղեկացնում է, որ առաջնագծում հակառակորդի ցանկացած շարժ, այդ թվում՝ ամենաբարձր մակարդակով իրականացված, գտնվում է ՊԲ համապատասխան ծառայությունների մշտադիտարկման ներքո, իսկ դիրքապահ ստորաբաժանումները պատրաստ են հարկ եղած դեպքում ձեռնարկել իրադրությունից բխող անհրաժեշտ քայլեր»: