Գլխավոր Իրավական Դատարանը մերժել է Արմեն Թավադյանի գործով դատախազին վարույթից հեռացնելու մասին պաշտպանի միջնորդությունը....

Դատարանը մերժել է Արմեն Թավադյանի գործով դատախազին վարույթից հեռացնելու մասին պաշտպանի միջնորդությունը. Armtimes.com

12
0

Երեւանի ընդհանուր իրավասության դատարանի Կենտրոնի նստավայրում դատավոր Կարեն Ֆարխոյանի նախագահությամբ այսօր նշանակված էին «5-րդ ալիք»-ի սեփականատեր Արմեն Թավադյանի վերաբերյալ երկու քրեական գործերով դատական նիստեր, որոնցից մեկը կայացել է, մյուսը՝ հետաձգվել:

Այս մասին «Հայկական ժամանակ»-ի հետ զրույցում տեղեկացրեց Թավադյանի պաշտպան Հովհաննես Խուդոյանը:

Գործերից մեկով, Արմեն Թավադյանն ու Ռոբերտ Քոչարյանի աջակից Վարուժան Մկրտչյանը մեղադրվում են Մարտի 1-ի գործով տուժողին սուտ ցուցմունք տալու դիմաց կաշառելու համար: Այս գործն ի սկզբանե մակագրված է եղել Երեւան քաղաքի դատարանի նախագահ Արթուր Մկրտչյանին, սակայն վերջինս առաջին դատական նիստին որոշում է կայացրել գործը փոխանցել դատավոր Կարեն Ֆարխոյանին, քանի որ նրա վարույթում է գտնվում Արմեն Թավադյանի վերաբերյալ մյուս քրեական գործը: Այդ գործով, որով տուժողի կարգավիճակ ունի հասարակական-քաղաքական գործիչ Վարդգես Գասպարին, Թավադյանը  մեղադրվում է որպես զենք օգտագործվող առարկայի գործադրմամբ խուլիգանության համար: Նա առաջադրված մեղադրանքները չի ընդունում:

Մեր զրույցում Արմեն Թավադյանի պաշտպան Հովհաննես Խուդոյանը տեղեկացրեց, որ Թավադյանը այսօրվա նիստին չի մասնակցել՝ համավարակով պայմանավորված: Ներկա չի եղել նաեւ Վարդգես Գասպարիի շահերի ներկայացուցիչ Տիգրան Եգորյանը, ուստի այդ գործով նշանակված նիստը հետաձգվել է: Ինչ վերաբերում է Թավադյանի եւ Մկրտչյանի վերաբերյալ քրեական գործին, պաշտպանը տեղեկացրեց, որ դրանով կայացել է նախնական դատական նիստ. «Այս գործով դատախազին բացարկի միջնորդություն ենք ներկայացրել՝ նշելով, որ նախաքննության փուլում շատ խախտումներ են արվել, որոնց վրա դատախազը աչք է փակել, եւ ամենահիմնականն այն է, որ Վերաքննիչ դատարանն է օրինական ուժի մեջ մտած դատավճռով հաստատել, որ ՀՀ ՔՕ-ի 340-րդ հոդվածի 4-րդ մասով հիմնավոր կասկած չկա, իսկ դրանից հետո որեւէ բան գործում չի ավելացվել, եւ անտեսելով դա՝ Դատախազությունը գործն ուղարկել է դատարան»: Խուդոյանի խոսքով՝ դատարանը, քննության առնելով իր միջնորդությունը, որոշել է այն մերժել: Թե ինչ հիմքով, իրեն հայտնի չէ. դատարանի որոշումը դեռ չի ստացել:

Այնուհետեւ քննարկվել է երկու գործերի միացման հարցը, որը, սակայն, հետաձգվել է. դրա վերաբերյալ վերջնական որոշում դեռեւս չկա: Թավադյանի պաշտպան Հովհաննես Խուդոյանի համոզմամբ՝ միացումը ավելի շատ խանգարելու է գործերի քննությանը. «Միացման դատավարական նպատակը հենց այն է, որ ավելի հեշտ լինի դատարանի համար, բայց քանի որ սա դատական վարույթ է, եւ մի գործը մյուսի հետ կապ չունի, տարբեր ամբաստանյալներ են, տարբեր դատախազներ, մեկով տուժող կա, մյուսով՝ չէ, ավելի շատ բարդացնելու է պրոցեսը, քան հեշտացնի»: Հարցին՝ պաշտպանական կողմը միայն գործընթացի բարդացմա՞ն խնդիր է տեսնում, թե՞ նաեւ իրավական ընթացակարգերի, Հովհաննես Խուդոյանը պատասխանեց. «Իրավական խնդիր կա, որ ավելի շատ վերաբերում է Վարուժան Մկրտչյանին, միջնորդավորված՝ նաեւ Արմեն Թավադյանին. ի սկզբանե այս գործով օրինական կազմը եղել է Արթուր Մկրտչյանը, իսկ օրենսդրությունը չի նախատեսում մի քանի դատարանների վարույթում եղած գործերի միացում, ինչ-որ մեկնաբանություն տվել է պարոն Մկրտչյանը, որ ուղարկի պարոն Ֆարխոյանին, որպեսզի վերջինս քննարկի այս հարցը, բայց այդ գործը ուղարկելու ընթացակարգ ոչ ԲԴԽ որոշումներով, ոչ դատավարությամբ նախատեսված չէ, դա ավելի շատ մեկնաբանական-ստեղծագործական մոտեցում է, ու թեեւ մենք սկզբունքորեն դեմ չենք եղել, բայց քանի որ օրենքը դա չի նախատեսում, պաշտոնատար անձը դա չի կարող անել»: Հարցին՝ արդյո՞ք այդ միացումը չի արվելու Քրեական դատավարության օրենսգրքի 28-րդ հոդվածի շրջանակներում, ըստ որի՝ քննիչի, դատախազի կամ դատարանի կողմից մեկ վարույթում կարող են միացվել մի անձի կողմից կատարված մի քանի հանցագործությունների վերաբերյալ գործերը, Խուդոյանը պատասխանեց, որ եթե նույն դատավորի մոտ լինեին, խնդիր չէր առաջանա. «Բայց երբ դատավոր է փոխվում, արդեն մակագրման ընթացակարգ է խախտվում, որովհետեւ համակարգը պատահականության սկզբունքով մակագրել է մի դատավորի, բայց ստացվում է, որ արդեն որոշված է, թե ով է լինելու դատավորը»: Ինչ վերաբերում է գործով մյուս ամբաստանյալ Վարուժան Մկրտչյանին, վերջինս չի առարկել գործերի միացմանը. «Սակայն Վարուժան Մկրտչյանն այժմ պաշտպան չունի, նախաքննության փուլում հրաժարվել է իր պաշտպանից, այնուհետեւ նրան տրամադրվել է հանրային պաշտպան, որից եւս հրաժարվել է, ինչը քննիչը ընդունել է, բայց իմ կարծիքով՝ չպիտի ընդուներ. միայն իր ցանկությունը բավարար չէ, որովհետեւ Քր. Դատ. օրենսգիրքը պահանջ է նախատեսում, որ եթե երկու ամբաստանյալներից մեկը պաշտպան ունի, մյուսը եւս պետք է ունենա»: Խուդոյանի խոսքով՝ թեեւ Մկրտչյանը նշել է, որ ինքը կարող է իր իրավունքները ինքնուրույն ներկայացնել, սակայն դատարանը որոշել է հաջորդ դատական նիստով նրա համար հանրային պաշտպան ներգրավել:

Հովհաննես Խուդոյանը տեղեկացրեց նաեւ, որ ինչպես Արմեն Թավադյանի վերաբերյալ նախորդ գործով, սրանով եւս գործի նյութերը իրենց չեն տրամադրվել Թավադյանի համար հասկանալի լեզվով՝ ռուսերենով. «Գլխավոր դատախազությունը հերթական խախտումն է արել՝ ռուսերեն թարգմանված նյութեր մեզ չտրամադրելով, նույն խնդիրը նույն դատավորի մոտ նաեւ մյուս գործով էր. քննչական մարմիններն իրենց ծախսերը քչացնում են դատարանի ծախսերի հաշվին»,- նշեց պաշտպանը՝ հավելելով, որ դատական նիստը այդպիսով հետաձգվել է, որպեսզի պատրաստվեն նյութերի թարգմանությունները:

Շարունկաությունը սկզբնաղբյուր կայքում