Գլխավոր Լուրեր Ամենայն Հայոց Կաթողիկոսը ուղերձ է հղել Մեծ պահքի առթիվ

Ամենայն Հայոց Կաթողիկոսը ուղերձ է հղել Մեծ պահքի առթիվ

4
0

Ամենայն Հայոց Կաթողիկոսը ուղերձ է հղել Մեծ պահքի առթիվ: Այս մասին հայտնում է Մայր Աթոռի Տեղեկատվական համակարգը:

Ստորև ներկայացնենք ուղերձն ամբողջուևթյամբ.

«Սիրելի´ բարեպաշտ զավակներ մեր,

Այսօր սկսվում է Մեծ պահքը, ապաշխարության խորհրդավոր շրջան, որի ընթացքին մենք առանձնակի պատրաստությամբ նորոգում ենք մեր անձերը, միտքն ու հոգին՝ մաքուր սրտերով ընդունելու մեր Տեր Հիսուս Քրիստոսի հրաշափառ Հարության ավետիսը:

Մեծ պահքը հրավեր է վերատեսության ենթարկելու և ճշմարիտ պատվիրանապահությամբ սրբագրելու մեր կյանքի ընթացքը՝ աղոթքով ու բարի գործերով այն հաստատելու տերունապատվեր սիրո, հավատի ու հույսի մեջ:

Պահեցողության լուսավոր խորհուրդը զորացնում է հավատքը և նորոգություն բերում մեր կյանքին՝ դառնալով կարևոր միջոց հոգևոր-բարոյական արժեքների ամրապնդման և Աստծո հետ հաղորդակցության զորացման:

Այս հոգևոր ճամփորդության սեմին հորդորում ենք մեր Սուրբ Եկեղեցու հավատավոր զավակներին ջերմեռանդ աղոթքով անցկացնել պահքի շրջանը, ներհայեցողությամբ ու պահեցողությամբ կյանքն իմաստավորել հոգու առատ պտուղներով, հավատարիմ մնալ քրիստոնեական վկայության մեջ, որպեսզի մեր Տիրոջ Սուրբ Հարության տոնին արժանանանք Նրա կենսապարգև շնորհներին ու երկնառաք օրհնություններին:

«Նորոգվեցեք ձեր մտքի նորոգությամբ, որպեսզի դուք քննեք լավը, և թե ինչ է Աստծու կամքը բարին և հաճելին և կատարյալը» (Հռոմ. 12:2):

Երկնավոր մեր Տիրոջ շնորհը, սերը և խաղաղությունը թող ամենքիս հետ լինեն: Ամեն»: