Ապրիլի 20-ին Կամերային թատրոնի շենքում կայացավ Հարություն Հարությունյանի «Կամք, միտք և Մարգարիտա» գրքի շնորհանդեսը։
«Կամք, միտք և Մարգարիտա»-ն ինքնակենսագրական վիպակ է, որը կարդալուց հետո կյանքը քո առջև ներկայանում է այլ գույներով։ Իսկ այդ գույներն ավելի են խտանում, երբ ճանաչում ես հեղինակին՝ Հարությունին։
Հարությունը ծնվել է առաջնային իմունային անբավարարություն (ԱԻԱ) հիվանդությամբ, և գրքում հեղինակը բավականին հետաքրքիր լուծումներով նկարագրում է իր հոգեվիճակը, հիվանդությունը հաղթահարելու ուղիները, ինչի շնորհիվ այսօր ունի ամուր ընտանիք, որի հիմքում սերն է ու կամքը։
Հարություն Հարությունյանը հիմնադրել է «Իմուն» բարեգործական հիմնադրամը, որի նախագահն է հանդիսանում, և «Կամք, միտք և Մարգարիտա» գրքի վաճառքի ամբողջ շահույթը կփոխանցվի հիմնադրամին։
Հիմնադրամը կօգնի ԱԻԱ պացիենտների վերաբերյալ տվյալների համակարգված հավաքագրմանը, որը կնպաստի հիվանդության վաղ ախտորոշմանը, լիարժեք թեստավորմանը, բուժական համալիր միջոցառումների կազմակերպմանը, հնարավոր բարդությունների առաջացման կանխարգելմանը և կաջակցի նրանց հոգեբանական վերականգնմանը։
Աշխարհում ավելի քան 6 միլիոն մարդ տառապում է առաջնային իմունային անբավարարությամբ, որոնցից 70-90 տոկոսը մնում է չախտորոշված։
