Բաժանորդագրվեք araratnews-ի տելեգրամ ալիքին։
Վրաստանի պատրիարքարանը կոչ է արել Ադրբեջանի իշխանություններին թույլատրել կանոնավոր պատարագներ մատուցել երկրի Գախի շրջանում գտնվող Սուրբ Գեորգի Քուրմուխ եկեղեցում։
«Մենք դիմում ենք Ադրբեջանի իշխանությունների համապատասխան ներկայացուցիչներին, որպեսզի Քուրմուխի Սուրբ Գեորգի եկեղեցին դառնա գործող տաճար, և Վրաստանի պատրիարքարանին թույլատրվի կանոնավոր կերպով պատարագ մատուցել այնտեղ»,- ասվում է հաղորդագրության մեջ։
Բողոքի պատճառ է դարձել եկեղեցում նկարահանված տեսահոլովակը։ Պատրիարքարանի տվյալներով՝ դրանում ադրբեջանցի երաժիշտը վրացական «Աճառուլի» երգը կատարում է «էլեկտրոնային երաժշտական գործիքի» նվագակցությամբ։
Հաղորդվում է, որ տեսահոլովակը առաջացրել է հասարակության վրդովմունքը: Հրապարակումից մի քանի օր անց հեղինակը ջնջել է այն YouTube-ից։ Երաժիշտը նաև վստահեցրել է, որ տեսահոլովակը նկարահանել է վրացական մշակույթի հանդեպ ունեցած սիրուց և հարգանքից ելնելով։
«Նման դեպքերը ևս մեկ անգամ հաստատում են, թե որքան կարևոր է վերականգնել ադրբեջանական տարածքում վրացական եկեղեցիների և վանքերի սկզբնական առաքելությունը։ Ուստի, դիմում ենք Ադրբեջանի իշխանությունների համապատասխան ներկայացուցիչներին, որպեսզի Քուրմուխի Սուրբ Գեորգի վանքը դառնա գործող տաճար, և Վրաստանի պատրիարքարանին իրավունք տրվի այնտեղ պարբերաբար ծառայություններ մատուցել, քանի որ վերոնշյալ փաստն առաջինը չէ և մենք մշտապես բախվում ենք լարվածության, հասարակության արդարացի վրդովմունքին և հավատացյալների զգացմունքները վիրավորող խնդրի»,- ասված է հայտարարության մեջ։