Բաժանորդագրվեք araratnews-ի  տելեգրամ ալիքին։

Ի՞նչն է եղել «Լռե» բալլադային ռոք ստեղծագործության ոգեշնչման աղբյուրը:

«Լռե»-ն ծնվեց իմ մեջ այն զգացումների ֆոնին, որոնք կապված են սիրո ու ներքին լռության հետ: Երբեմն մարդու ներսում լռությունը խոսում է ավելի բարձր, քան խոսքերը, և այդ լռությունը լի է զգացմունքներով, հիշողություններով ու անավարտ պատմություններով: Սա այն է, ինչ ցանկացա արտահայտել այս երգով:

Երգը ուղեկցվում է անիմացիոն տեսահոլովակով: Ինչո՞ւ ընտրեցիք հենց այս ֆորմատը, և կխոսե՞ք Հայկ Սայադյանի հետ համագործակցության մասին:

Անիմացիան, հատկապես ձեռքով արված, ունի մոգական ազդեցություն: Հայկ Սայադյանը հիասքանչ կերպով փոխանցեց երգի էմոցիոնալ լարվածությունն ու սյուժետային գիծը: Մեր համագործակցությունը շատ ներդաշնակ էր. նա լսեց երգը, կլանեց նրա գաղափարը և իր արվեստի միջոցով «Լռե»-ն ներկայացրեց յուրօրինակ տեսանկյունից:

Երգի խոսքերը գրել է Արթուր Սարգսյանը, իսկ երաժշտության հեղինակը Դուք եք։ Ինչպե՞ս ստացվեց այս համագործակցությունը:

Արթուր Սարգսյանը տաղանդավոր բանաստեղծ է, որը կարողանում է գրի առնել զգացմունքների նրբությունը: Նրա խոսքերը հենց առաջին ընթերցումից ինձ հետ խոսեցին: Այնուհետև երաժշտությունը պարզապես եկավ ինքնըստինքյան, կարծես պատրաստ լիներ, միայն սպասում էր ճիշտ պահին:

Ձեր ստեղծագործական թիմը նույնպես ուժեղ է՝ Կարեն Արզումանյանի գործիքավորումը և Սերգեյ Գասպարյանի ձայնային ռեժիսուրան: Ինչպե՞ս կգնահատեք նրանց ներդրումը:

Առանց նրանց այս երգը չէր ունենա այն ամբողջականությունը, որը հիմա ունենք: Կարենը մեծ վարպետությամբ մուտք գործեց երգի ամեն մի նոտա, իսկ Սերգեյը հասցրեց այն կատարելության՝ ձայնի ամեն մանրուքը ներդաշնակ դարձնելով: Սա թիմային աշխատանքի լավագույն օրինակներից է:

Վերջում կցանկանայի հարցնել՝ ի՞նչ սպասի Ձեր հանդիսատեսը մոտ ապագայում:

Ես միշտ աշխատում եմ նորություն բերել իմ լսարանին: Ունեմ մի քանի նոր նախագծեր, որոնց վրա հիմա աշխատում եմ: Իսկ մոտ ապագայում, իհարկե, կլինեն նաև համերգներ, որտեղ «Լռե»-ն կներկայացվի կենդանի կատարմամբ: Հանդիսատեսի սերն ու աջակցությունը իմ աշխատանքի ամենամեծ պարգևն է։