Բաժանորդագրվեք araratnews-ի տելեգրամ ալիքին։
Միլիարդատեր Իլոն Մասկը որոշել է փորձարկել իր կարողությունները նոր բիզնես ուղղությամբ։ Նրա ընկերությունը՝ Tesla-ն, Հոլիվուդում բացել է արագ սննդի ռեստորան՝ մարտահրավեր նետելով աշխարհի խոշորագույն ցանցերին, ինչպիսիք են McDonald's-ը, Wendy's-ը և IHOP-ը:
Այս մասին գրում է Daily Mail-ը։
250 այցելուի համար նախատեսված հաստատությունը զբաղեցնում է երկու հարկ։ Ստորին հարկում գտնվում է հիմնական սպասարկման գոտին, որտեղ հյուրերը կարող են ճաշել։ Ճաշացանկը բաժանված է վեց բաժնի՝ նախաճաշեր, բուրգերներ և սենդվիչներ, մանկական ճաշացանկ, խավարտներ, աղանդեր և ըմպելիքներ։ Ի դեպ, սնունդը կարելի է պատվիրել նախապես՝ անմիջապես մեքենայի էկրանից։
Երկրորդ հարկում, որը կոչվում է Skypad, այցելուները կարող են հիանալ Լոս Անջելեսի տեսարանով կամ ֆիլմեր դիտել երկու 14 մետրանոց LED մեգաէկրաններից մեկով՝ ստանալով պոպկորն Tesla Optimus ռոբոտի ձեռքերից: Ի դեպ, Մասկի էլեկտրական մեքենայի սեփականատերերը կարող են ավարտել ֆիլմի դիտումը իրենց մեքենայում գտնվող սենսորային էկրանին, անհրաժեշտության դեպքում՝ օգտագործելով Tesla Diner հավելվածը:
Նախքան դուրս գալը, այցելուները կարող են այցելել հուշանվերների խանութ և գնել բացառիկ ապրանքներ: Հավաքածուն ներառում է Tesla Bot-ի արձանիկ, Hollywood Retro Diner մարզաշապիկ, Tesla-ի մարմելադներ և Tesla Diner գլխարկ:
Ռեստորանից դուրս գտնվում է աշխարհի ամենամեծ քաղաքային էլեկտրական մեքենաների լիցքավորման կայանը՝ 80 V4 Supercharger շարքերով, որոնք տեղավորում են բոլոր NACS չափանիշներին համապատասխանող էլեկտրական մեքենաները: Tesla-ն նշում է, որ տարածքում ստվեր ապահովող արևային ծածկերի շնորհիվ օբյեկտի ածխածնի արտանետումները տարեկան կրճատվում են մոտ 26.6 միլիոն ֆունտ ածխաթթու գազով, ինչը լիցքավորումն ավելի էկոլոգիական է դարձնում:
