Բաժանորդագրվեք araratnews-ի տելեգրամ ալիքին։
Առնվազն հաջորդ մի քանի տարիներին Ֆրանսիայի նախագահ Նիկոլա Սարկոզիի փոստային հասցեն կլինի Փարիզի 14-րդ թաղամասի Սանտե փողոց 42-ը՝ «La Santé» բանտը։ Սա Ֆրանսիայի ամենահայտնի՝ տղամարդկանց բանտն է, որի մուտքի պատին գրված արտահայտությունը հայտնի է ամբողջ Ֆրանսիայում՝ «Մի՛ կորցրու հույսդ»։
Նախկինում «La Santé»-ն համարվել է Ֆրանսիայի ամենադաժան բանտերից մեկը՝ գերբնակեցման և վատ պայմանների պատճառով։ Մինչև 1970-ականները «La Santé»- ում էին կատարվում գիլյոտինով մահապատիժները։ Վերջին մահապատիժը տեղի է ունեցել 1972-ին։ Սակայն վերջին տասնամյակում այն հիմնովին բարեփոխվել է․ ներկայումս բանտն ունի ավելի մարդասիրական պայմաններ՝ ըստ Եվրոպական մարդու իրավունքների հանձնաժողովի գնահատականների։
«La Santé»-ն համարվում է վայր, որտեղից փախչելը հեշտ չէ։ Բանտի պատմության ընթացքում հաջողված փախուստների թիվը կարելի է ձեռքի մատների վրա հաշվել։ Այն ընդունել է շատ հայտնի թե՛ քաղաքական գործիչների, թե՛ այլ ոլորտներից հայտնիների։
Մինչև 2000 թվականը բանտարկյալները բանտի ներսում բաժանվում էին աշխարհագրական և ազգային պատկանելության։ Նրանց մեծ մասը տեղավորված էր չորս թևերում՝ A՝ Արևմտյան Եվրոպա, B՝ Ենթասահարա, C՝ Մաղրիբ և D՝ աշխարհի մնացած մասը։
Բանտը փորձում է ապահովել կրոնական ծառայություններ բոլոր հավատացյալների համար։ Կաթոլիկ, մուսուլման և հրեական հոգևորականներ պարբերաբար այցելում են բանտարկյալներին։
Ժամանման օրը Սարկոզին կհանդիպի բանտի բժշկի հետ, որը կստեղծի բանտարկյալի համար անհատական առողջապահական քարտ:
Նրան կտրվեն նույն իրավունքները, ինչ մյուս կալանավորներին՝ շաբաթական երեք այցելություն և իր խցում հեռախոսից անընդհատ օգտվելու հնարավորություն, չնայած նա կկարողանա զանգահարել միայն դատական մարմինների կողմից հաստատված համարներին։
Սարկոզիի զբոսանքները կկազմակերպվեն առանձին՝ հատուկ ցանկապատված բակում, որտեղ նա կկարողանա գնալ օրական երկու անգամ՝ առանց այլ կալանավորների հետ հանդիպելու։
Նման հատուկ բաժիններ «հատուկ հյուրերի» համար գոյություն ունեն բոլոր ֆրանսիական բանտերում: Հայտնի և խոցելի անձինք շարունակում են մնալ առանձին՝ ոչ թե իրենց հարմարության, այլ անվտանգության համար. նրանք կարող են դառնալ այլ կալանավորների ագրեսիայի թիրախ։