Ազգային ժողովը սեպտեմբերի 14-ի նիստում քննարկեց Վճռաբեկ դատարանի դատավորի թեկնածուի ընտրության հարցը:

Հիշեցնենք, որ Բարձրագույն դատական խորհուրդը Վճռաբեկ դատարանի քաղաքացիական եւ վարչական պալատի դատավորի թափուր տեղի համար առաջադրել է Հովսեփ Բեդեւյանի, Հրաչ Այվազյանի եւ Լիանա Հակոբյանի թեկնածությունները:

ԲԴԽ նախագահի պաշտոնակատար Գագիկ Ջհանգիրյանը ներկայացրեց Վճռաբեկ դատարանի դատավորի թեկնածու Հովսեփ Բեդեւյանի կենսագրական տվյալները, մասնագիտական հմտությունները եւ աշխատանքային ուղին:

Հովսեփ Բեդեւյանը խոսեց դատական իշխանության դերի եւ նշանակության, իշխանության տարանջատման սկզբունքների, օրենսդիր, գործադիր եւ դատական իշխանության գործունեության առանձնահատկությունների մասին, ներկայացրեց Վճռաբեկ դատարանի գործունեության արդյունավետության վերաբերյալ իր տեսլականը, անդրադարձավ վարչական արդարադատության խնդիրներին:

Ըստ թեկնածուի՝ իշխանությունների տարանջատման համակարգում դատական իշխանությունն ունի հստակ դերակատարություն. այն օրենսդիր եւ գործադիր իշխանությանը հավասարակշռող գործոն է: Հովսեփ Բեդեւյանն ընդգծեց, որ մասնագիտացված վարչական դատարանների ստեղծումը կարեւոր քայլ էր արդարադատության համակարգի արդյունավետության բարձրացման տեսակետից, սակայն այս գործընթացն առայսօր չունի ավարտուն եւ վերջնական տեսք: Նրա համոզմամբ՝ միայն առանձին Վարչական պալատի ստեղծման պարագայում կարելի է բեռնաթափել Վճռաբեկ դատարանի աշխատանքը եւ ապահովել արդյունավետ քննություն: Փաստելով, որ որեւէ պետությունում իդեալական դատական համակարգ գոյություն չունի՝ թեկնածուն նշեց, որ վստահության բարձր մակարդակ վայելող դատական համակարգ ձեւավորելն ուտոպիստական գաղափար չէ. այս հարցում ծանրակշիռ դերակատարություն պետք է ունենա բարձրագույն դատական ատյանը, որը չունի սխալվելու իրավունք:

Անդրադառնալով ոլորտի հնարավոր կառուցվածքային բարեփոխումներին՝ Հովսեփ Բեդեւյանը համոզմունք հայտնեց, որ ձեւավորվելիք Վարչական պալատը պետք է լրացնի վարչական գործերով օրենքների եւ այլ նորմատիվ իրավական ակտերի միատեսակ կիրառության հարցում այսօր գոյություն ունեցող բացը՝ կայուն, ոչ հակասական եւ ստորադաս դատարաններին ճիշտ կողմնորոշող նախադեպային պրակտիկա մշակելու միջոցով:

104