Ինչպես տեղեկացրել ենք, այսօր վարչապետ Նիկոլ Փաշինյանը կառավարությունում հանդիպում է ունեցել արտախորհրդարանական քաղաքական ուժերի ներկայացուցիչների հետ:
Վարչապետն անդրադարձել է Ադրբեջանի կողմից Թուրքիայի անմիջական աջակցությամբ սանձազերծված պատերազմի հետևանքով ստեղծված իրավիճակին, կառավարության քայլերին և գործողություններին, այդ թվում՝ դիվանագիտական ասպարեզում, ինչպես նաև պատասխանել մի շարք հարցերի:
Քաղաքական ուժերի ներկայացուցիչները ներկայացրել են իրենց դիտարկումներն ու առաջարկությունները հակառակորդի դեմ պայքարի և հետագա քայլերի ուղղությամբ:
Զրուցակիցները ողջունել են նման ձևաչափով մտքերի փոխանակությունը: Նշվել է, որ կախված իրավիճակից՝ նմանատիպ հանդիպումները կարող են կրել շարունակական բնույթ:
Հանադիպումը եղել է դռնփակ: Արտախորհրդարանական ուժերի ներկայացուցիչները հանդիպումից հետո մանրամասներ չեն հայտնել, քանի որ այս փուլում նպատակահարմար չէ բարձրաձայնել քննարկման թեման:
ԼՀԿ ղեկավար Էդմոն Մարուքյանը լրագրողների հետ ճեպազրույցում ասաց,որ խորհրդարանական ուժերը աշխատում են յուրաքանչյուրն իր լծակով :
«Այսօր 16:30 Եվրապայի խորհրդի խորհրդարանական վեհաժողովի ընդլայնված պաշտոնական հանդիպում է լինելու, որտեղ քննարկվելու է մեր պատերազմը: Գրանցված ենք բոլորս: Հույս ունեմ գոնե երկու-երեք ելույթ կարող ենք ունենալ: Թեժ մարտեր են սպասվում: Իրավիճակը շատ բարդ է, պատերազմ է: Այս պահին մարտի դաշտում որոշվում է մեր պետության ճակատագիրը»,- կարևորեց Մարուքյանը: