Անօդաչու թռչող սարքը կործանվել է Կոլոմնայի Գուբաստովո գյուղի մոտ։ Այս մասին Telegram-ի իր ալիքում հայտնել է Մոսկվայի մարզի նահանգապետ Անդրեյ Վորոբյովը։
«Ըստ Կոլոմնա քաղաքային թաղամասում անօդաչու թռչող սարքի անկման հետ կապված միջադեպի՝ դա տեղի է ունեցել Գուբաստովո գյուղի մոտ, թիրախը հավանաբար եղել է քաղաքացիական ենթակառուցվածք, այն չի տուժել։ Զոհեր կամ ավերածություններ չկան։ ԱԴԾ-ն և իրավասու մյուս մարմինները հետաքննում են իրավիճակը, բնակիչների անվտանգությանը ոչինչ չի սպառնում»,- գրել է նա։
Ավելի ուշ «Գազպրոմը» հաստատել է անօդաչու թռչող սարքի ընկնելը Կոլոմնայից հարավ գտնվող Վոսկրեսենսկի կայանի մոտ, հայտնում է Ura.ru-ն՝ հղում անելով կայանի ղեկավարությանը։ «Այո, մեր կողքին անօդաչու թռչող սարք է ընկել։ Դա որևէ կերպ չի ազդել աշխատանքի վրա»,- նշել են ընկերությունում: Նրանք հայտնել են, որ դեպքի վայրում են շտապօգնության ծառայությունները։