Երևանի Կենտրոն վարչական շրջանի աշխատակազմից տեղեկացնում են. «Օղակաձև զբոսայգու 6-րդ հատվածում որոշ քաղաքացիների կողմից դրսևորվող վարքը առաջացնում է քաղաքացիների դժգոհությունն ու ստեղծում անհարմարություններ անցորդների և հյուրերի համար:

Խնդիրը լուծելու համար պարբերաբար քայլեր են ձեռնարկվում՝ համապատասխան մասնագետների ներգրավմամբ:

Այսօր ևս ՀՀ Ոստիկանության հետ համատեղ ձեռնարկվել են միջոցառումներ. նշված վայրում հայտնաբերված անօթևաններից 1-ը տեղափոխվել է հիվանդանոց, 2-ը հրաժարվել են տեղափոխվել ժամանակավոր կացարան: Վերջիններիս հետ աշխատանքներ են տարվում համապատասխան կացարան տեղափոխելու համար:

Հիշեցնենք, որ նշված անձանց հետ բազմիցս տարվել են բացատրական աշխատանքներ, որից հետո նրանց տեղափոխել են կացարան, սակայն այնտեղ դրսևորելով ոչ պատշաճ վարք՝ ստեղծել են կոնֆլիկտային իրավիճակներ և հեռացել հաստատությունից:

Կոմունալ տնտեսության բաժնի նախաձեռնությամբ տարածքում իրականացվել են մաքրման աշխատանքներ, կազմակերպվել է տարածքից աղբի դուրս բերումը:

Հարգելի՛ քաղաքացիներ, հիշեցնենք, անօթևանների հետ կապված հարցերով կարող եք դիմել Միացյալ սոցիալական ծառայություն (հեռ․060652718) և ՀՀ ոստիկանություն»:

848