Բաժանորդագրվեք araratnews-ի  տելեգրամ ալիքին։

«Տաշիր գրուպ» ընկերությունների խմբի փոխնախագահ, ՀՀ-ում իշխանությունը զավթելու և սահմանադրական կարգի տապալման հրապարակային կոչեր հնչեցնելու մեղադրանքով կալանավորված Սամվել Կարապետյանի եղբոր տղան՝ Նարեկ Կարապետյանը, Սամվել Կարապետյանի հիմնադրած «Մեր ձևով» շարժման մեկնարկին նվիրված միջոցառման ժամանակ հայտարարել է, թե Ս. Կարապետյանի «մեր ձևով» արտահայտությունը թևավոր խոսք է դարձել ամբողջ աշխարհի հայերի համար:

Ի դեպ, Նարեկ Կարապետյանն այս շարժման համակարգող խորհրդի գլխավոր պատասխանատուն է:

Վերջինս փորձել է բացատրել, թե ինչ է նշանակում վերոնշյալ արտահայտությունը:

«Կարծում ենք՝ արդեն բոլորը հասկացել են, որ «մեր ձևով» նշանակում է հայավարի, այսինքն՝ պատվով, աշխատասիրությամբ և խելքով։ «Մեր ձևով» նշանակում է արժանապատվությամբ, այսինքն՝ հանուն մեր երեխաների իրական ու բարեկեցիկ ապագայի, ու մենք ինչ անենք, անելու ենք մեր ձևով»,- մանրամասնել է նա հորեղբոր հայտարարությունը:

Ուշագրավ է, որ Սամվել Կարապետյանի որդին էլ՝ Սարգիս Կարապետյանը, Ս. Կարապետյանի պաշտպանության համար նախաձեռնված հանրահավաքում հայտարարել էր, թե «մեր ձևով» արտահայտությունը «ազատության սլոգան է»:

Սարգիս Կարապետյանը դրանից հետո ևս մեկ անգամ հայտնվել էր լրատվամիջոցների ուշադրության կենտրոնում, երբ բազմաթիվ լրագրողների մոտ ընդամենը մեկ լրագրողի բարձրաձայն ասել էր, թե կարող է բացառիկ բան ասել նրան:

«Մի հատ սենսացիոն բան կարամ ասեմ, բայց մենակ ձեզ՝ արդարությունը վերջում հաղթելու ա»,- ասել էր միլիարդատերի որդին:

Նրա այս հայտարարությունը համացանցում դարձել էր քննարկման և մեմերի առարկա:

Աղբյուր՝ armtimes.com