Բաժանորդագրվեք araratnews-ի տելեգրամ ալիքին։
Պաղեստինյան արմատական ՀԱՄԱՍ խմբավորումը եգիպտացի միջնորդների հետ համաձայնության է եկել Գազայի հատվածում Իսրայելի հետ հրադադարի համաձայնագիրը պահպանելու և պատանդներին ազատ արձակելու վերաբերյալ։ Այս մասին հայտնում է The Jerusalem Post-ը։
Թերթը, վկայակոչելով եգիպտական աղբյուրները, գրում է, որ կողմերի միջև գործարքը կպահպանվի իր սկզբնական տեսքով՝ մարդասիրական օգնության և վառելիքի դիմաց։ Սպասվում է, որ մատակարարումները անկլավ կհասնեն փետրվարի 13-ին, որից հետո խումբը կհայտարարի երեք բանտարկյալների անունները, որոնք ազատ կարձակվեն փետրվարի 15-ին։
Փետրվարի 10-ին ՀԱՄԱՍ-ի խոսնակ Աբու Ուբեյդան հայտարարել էր, որ խմբավորումը հետաձգել է փետրվարի 15-ին նախատեսված պատանդների փոխանակումը Իսրայելի կողմից Գազայի վերաբերյալ «պայմանագրի խախտման» պատճառով։