ՀՀ դատախազությունն արդեն Հակակոռուպցիոն դատարան է ուղարկել ԱԺ «Հայաստան» խմբակցության ղեկավար Սեյրան Օհանյանի, խմբակցության քարտուղար Արծվիկ Մինասյանի և ևս չորս անձի վերաբերյալ մեղադրական եզրակացությունները։ Այս մասին տեղեկանում ենք «Դատալեքս» հարթակից։ 

Ըստ մեղադրական եզրակացության՝ Սեյրան Օհանյանը զբաղեցնելով ՀՀ պաշտպանության նախարարի պաշտոնը, հանդիսանալով պաշտոնատար անձ, շահադիտական և անձնական շահագրգռվածությամբ պաշտոնեական դիրքը ծառայության շահերին հակառակ օգտագործելով 2010-2015 թվականների ընթացքում զավթել՝ առանց իրավական հիմքերի զբաղեցրել է բնության հատուկ պահպանվող տարածք հանդիսացող, «Սևան» ազգային պարկ» ՊՈԱԿ-ի տարածքում ընդգրկված, պետական սեփականություն հանդիսացող, Գեղարքունիքի մարզի Դրախտիկ համայնքի 1-ին փողոցի 71 հասցեում գտնվող 10526 քմ մակերեսով հողատարածքը և կառուցապատման իրավունքի բացակայության պայմաններում հանձնարարել է իր ենթակա, ՀՀ պաշտպանության նախարարության կապիտալ շինարարության և զորքերի բնակավորման վարչության պետի պաշտոնը զբաղեցրած Աշոտ Գրիգորյանին և այլ անձանց, ՀՀ պաշտպանության նախարարության կողմից իրականացված գնումների գործընթացներին մասնակցություն ունեցած շինարարական կազմակերպությունների ու դրանց ծառայողների ներգրավմամբ, կազմակերպել և ապահովել հիշյալ տարածքում իր համար առանձնատան կառուցումը։ Միևնույն ժամանակ, նշված տարածքի և այնտեղ գտնվող գույքի պահպանությունը Սեյրան Օհանյանի հանձնարարությամբ իրականացվել է ՀՀ պաշտպանության նախարարության ռազմական ոստիկանության ծառայողների կողմից, որոնց 2011-2016 թվականներին ՀՀ պետական բյուջեի միջոցների հաշվին վճարվել է առնվազն 13.120.000 ՀՀ դրամ աշխատավարձ։

Ըստ Արծվիկ Մինասյանին առաջադրված մեղադրանքի՝  զբաղեցնելով բնապահպանության նախարարի պաշտոնը, նա պաշտոնեական դիրքն օգտագործել է ծառայության շահերին հակառակ, որպիսի արարքների հետևանքով էական վնաս է պատճառվել հասարակության և պետության օրինական շահերին, և անզգուշությամբ առաջացել են ծանր հետևանքներ՝ խախտվել է պետական մարմնի, պետական ոչ առևտրային կազմակերպության և նշված մրցութային հանձնաժողովի բնականոն գործունեությունը, բնության հատուկ պահպանվող տարածքը տևական ժամանակ չի օգտագործվել նպատակային նշանակությամբ, կատարվել է առանձնապես ծանր հանցագործություն՝ բարձրաստիճան պաշտոնատար անձի կողմից կատարված արարքների արդյունքում հանցավոր ճանապարհով ձեռք բերված առանձնապես խոշոր չափերով գույքն օրինականացվել է:

Գործով մյուս ամբաստանյալ  Աշոտ  Գրիգորյանն էլ մեղադրվում է առանձնապես խոշոր չափերով կաշառք վերցնելու համար. նա, անձնական շահագրգռվածությունից և խմբային շահերից ելնելով, պաշտոնեական դիրքի օգտագործմամբ ստացել է առանձնապես խոշոր չափերով կաշառք:

Մյուս մեղադրյալ Լևոն Բարսեղյանը մեղադրվում է   պաշտոնատար անձի կողմից գործողություն կատարելու, այդպիսի գործողություն կատարելուն նպաստելու, ինչպես նաև թողտվության համար  առանձնապես խոշոր չափերով կաշառք տրամադրելու մեջ։

Բենիամին Ղալեչյան՝  մեղադրվում է Սեյրան Օհանյանի կողմից պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքի հետագա անխոչընդոտ տիրապետմանն ու օգտագործմանը՝ փողերի լվացմանը օժանդակելու մեջ։

Ըստ մեղադրական եզրակացության՝  Էդգար Գրիգորյանն էլ  օժանդակել է Սեյրան Օհանյանի կողմից պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքի հետագա անխոչընդոտ տիրապետմանն ու օգտագործմանը՝ փողերի լվացմանը։

Հիշեցնենք՝

 Սեյրան Օհանյանի նկատմամբ հարուցված հանրային քրեական հետապնդման ժամկետը լրանում է 2026 թվականի մայիսի 8-ին։

Արծվիկ Մինասյանի նկատմամբ հարուցված հանրային քրեական հետապնդման ժամկետը լրանում է 2026 թվականի մարտի 8-ին։

Աշոտ Գրիգորյանի նկատմամբ հարուցված հանրային քրեական հետապնդման ժամկետը լրանում է 2025 թվականի հոկտեմբերի 13-ին։

Լևոն Բարսեղյանի նկատմամբ հարուցված հանրային քրեական հետապնդման ժամկետը լրանում է 2025 թվականի օգոստոսի 13-ին։

Բենիամին Ղալեչյանի նկատմամբ հարուցված հանրային քրեական հետապնդման ժամկետը լրանում է 2026 թվականի հուլիսի 15-ին։

Էդգար Գրիգորյանի նկատմամբ հարուցված հանրային քրեական հետապնդման ժամկետը լրանում է 2026 թվականի հուլիսի 15-ին։