Բաժանորդագրվեք araratnews-ի տելեգրամ ալիքին։
Կառավարության պահուստային ֆոնդից 329 մլն 855 հազար դրամ կուղղվի ՀՀ Տավուշի մարզի Իջևան համայնքի Գետահովիտ բնակավայրի վարչական տարածքում ՈՒԵՖԱ-ի չափորոշիչներին համապատասխան ֆուտբոլի մարզադաշտի կառուցման համար անհրաժեշտ հողամասերի ձեռքբերմանը։
Որոշման նախագիծը Կառավարության դեկտեմբերի 18-ի նիստում ներկայացրել է ԿԳՄՍ նախարար Ժաննա Անդրեասյանը։
Ըստ նախարարի՝ նախագծով առաջարկվող լուծումը քննարկվել է Տավուշի մարզի գործընկերների հետ: Խոսքը 20 սեփականատերերի պատկանող հողամասերի ձեռքբերման մասին է, որը պետք է ծառայի ստադիոնի կառուցման համար: Հողամասերի վաճառքի մասով 20 սեփականատերերի գրավոր համաձայնություններն արդեն իսկ կան:
«Այս նախագծով առաջարկում ենք կապիտալ սուբվենցիա հատկացնել Իջևանի համայնքապետարանին, որպեսզի վերջինիս կողմից իրականացվի հողամասերի ձեռքբերում, նպատակային նշանակությունների փոփոխություն, այնուհետև հողամասերը նվիրաբերվեն ՀՀ-ին ստադիոնի կառուցման նպատակով»,- ասաց նախարարը:
Վարչապետ Նիկոլ Փաշինյանը հետաքրքրվեց՝ պատկերացում կա՞, թե ստադիոնը քանի հանդիսատեսի համար է լինելու, նախարար Անդրեասյանը պատասխանեց. «Խոսում ենք առնվազն 10 հազար տեղի մասին: Մենք արդեն իսկ Վանաձորի ստադիոնի շուրջ ունեցած միջազգային գործընկերների հետ քննարկումներով հասկանում ենք, որ ունենալով տրիբունան ամբողջական, շուրջ 12 հազար հոգի հնարավոր կլինի տեղավորել: ՈՒԵՖԱ-ի 4-րդ կատեգորիայի ստադիոնի մասին է խոսքը»: