Բաժանորդագրվեք araratnews-ի  տելեգրամ ալիքին։

Ամանորին հայկական սեղաններն աչքի են ընկնում իրենց ճոխությամբ ու բազմազանությամբ. մարդիկ նախապատրաստական աշխատանքներն սկսում են օրեր, երբեմն՝ շաբաթներ առաջ,  և դա, անշուշտ, սննդամթերքի անվտանգության տեսանկյունից բարձրացնում է ռիսկերը։ Հետևաբար, հատկապես այս ընթացքում շատ կարևոր է ճիշտ պահպանել սննդամթերքի անվտանգության ու պահպանման կանոնները՝սննդային թունավորումներից և առողջական այլ խնդիրներից խուսափելու համար։

Ինչպե՞ս ճիշտ պատրաստել խոզի բուդն ու որքան է դրա պահման ժամկետը, ինչպե՞ս ընտրել և պահպանել բաստուրման ու սուջուխը, ինչու՞ մայրաքաղաքային աղցանի վրա կանաչին պետք է ավելացնել վերջում, ի՞նչ խմորեղեն գնել ու ի՞նչ պատրաստել, ի՞նչ ջերմաստիճանի վրա դնել սառնարանն տոնական օրերին։

Այս և մի շարք այլ հարցերի,ինչպես նաև` ամենատարածված միֆերի մասին  #ԽորհուրդՄասնագետից շարքում anvtangsnund.am-ը Ամանորին ընդառաջ զրուցել Է ՀՀ ԳԱԱ «Էկոկենտրոնի» սննդի շղթայի ռիսկերի գնահատման կենտրոնի ղեկավար, սննդագետ Դավիթ Պիպոյանի հետ։

Ինչպե՞ս ճիշտ պատրաստել խոզի բուդը

Տոնական օրերին հայկական սեղաններից անպակաս է խոզի ազդրամիսը՝ բուդը։  Այն եփելիս պետք է  հիշել՝ շատ կարևոր է պատճաշ ջերմային մշակումը։ Կարևորվում է ինչպես ջերմաստիճանի ընտրությունը, այնպես էլ՝ եփման տևողությունը։ Խոզի բուդը պետք է եփել առնվազն 5-6 ժամ, իսկ եթե բուդը 6 կիլոգրամից ավելի է, ապա յուրաքանչյուր կիլոգրամի համար պետք է 1 ժամ ջերմային մշակում անել(օրինակ՝ եթե բուդը 8 կիլոգրամ է, պետք է 8 ժամ ջերմային մշակման ենթարկել)։

«Կարևոր է, որ մսեղիքի խորքում կարողանանք ապահովել պատշաճ ջերմաստիճան։ Որպեսզի տան պայմաններում հասկանաք, որ խոզի բուդը պատշաճ եփված է, ապա պետք է ստուգել, համոզվել, որ ոսկորը հեշտորեն անջատվի ոսկորից։ Եթե համոզվում եք, որ այդպես է, այսինքն՝ լավ եփվել է, միայն այդ դեպքում կարելի է համարել, որ խոզի բուդն արդեն պատրաստ է»,-ասում է սննդագետը։

Անդրադառնալով բաստուրմային ու սուջուխին՝ Դ. Պիպոյանն ասում է, որ պահպան տեսանկյունից դրանց ռիսկն ավելի քիչ է.

«Երբ հայկական խոհանոցի և ուտելիքների մասին եմ խոսում, բնականաբար, զգուշավոր եմ, բայց պետք է ասեմ՝ բաստուրման ու  սուջուխը չորացված են ու աղի շատ բարձր պարունակություն ունեն։ Այս տարի աղի հետ կապված հետազոտություն էինք անում։ Փորձաքննության ենթարկած՝ մեր մթերքներից բաստուման և սուջուխը ունեցել են աղի ամենաբարձր պարունակությունը։ Անշուշտ, աղի բարձր պարունակությունը խոչընդոտում է բակտերիաների աճը։ Սա շատ կարևոր է, ուստի բաստուրման ու սուջուխը պահպանման տեսանկունից ավելի նվազ ռիսկային են»,- նշում է Պիպոյանը։

Նա հիշեցնում է՝ խանութներում հիմա առկա է բաստուրմայի ու սուջուխի փաթեթավորված տեսականի, որն արդեն կտրատված է։ Ուստի, խիստ ցանկալի է բաստուրման ու սուջուխը ձեռք բերել վակուումային փաթեթավորմամբ և մատուցելուց առաջ բացել այդ տարաները։

Ի՞նչ խմորեղեն գնել կամ պատրաստել տոնական օրերին

Եթե ցանկանում եք խմորեղենն ավելի երկար պահպանել, ապա Դավիթ Պիպոյանը հորդորում է նախապատվությունը տալ այն թխվածքներին, որոնք կրեմով չեն.

«Այդ առումով մեր հայկական խոհանոցը այդ հնարավորությունը տալիս է։ Օրինակ, փախլավան, գաթան շատ ավելի երկար պիտանելության ժամկետ ունեն, քան կրեմային տորթերը։ Հատկապես, եթե թխվածքները սենյակային ջերմաստիճանում են գտնվում, կրեմային տորթերը շատ ավելի ռիսկային են»,- նշում է Պիպոյանը։

Սննդագետն խոսքով՝ սխալ է կարծել, թե կրեմային ու ոչ կրեմային տորթերը կարելի է միաժամանակ պատրաստել ու օրեր շարունակ պահպանել. պիտանելության ավելի երկար ժամկետ ունեն ոչ կրեմային տորթերը։ Կրեմային տորթերը պետք է քիչ գնել, այսինքն՝ այնքան, որ դրանք հնարավորինս շուտ սպառեք։

Շարունակությունը՝  anvtangsnund.am կայքում։