ՀՀ կրթության, գիտության, մշակույթի եւ սպորտի նախարար Վահրամ Դումանյանն այսօր ընդունել է ՀՀ-ում Ֆրանսիայի Հանրապետության արտակարգ եւ լիազոր դեսպան Ժոնաթան Լաքոտին: Հանդիպմանը ներկա է եղել նաեւ նախարարի տեղակալ Արթուր Մարտիրոսյանը:

Ողջունելով դեսպանին՝ ԿԳՄՍ նախարարը խոսել է հայ-ֆրանսիական բազմաշերտ համագործակցության մասին՝ փաստելով, որ կան բոլոր նախադրյալները համատեղ ծրագրերը շարունակելու եւ ընդլայնելու համար:

«Անցյալ տարին շատ բարդ էր Հայաստանի համար, բայց մենք մշտապես զգացել ենք Ֆրանսիայի աջակցությունը: Այժմ գործնական քայլեր ենք կատարում պատերազմի եւ կորոնավիրուսի համավարակի հարուցած դժվարությունները հաղթահարելու համար եւ այս տեսանկյունից կարեւորում ենք համատեղ ծրագրերի իրականացումը հատկապես կրթության ոլորտում, քանի որ իրական անվտանգությունն սկսվում է կրթությունից: Հաշվի առնելով հայ-ֆրանսիական դարավոր բարեկամությունը եւ համագործակցության հարուստ փորձը՝ երկկողմ հարաբերությունների շարունակական զարգացման համար հնարավորությունները լայն են»,- ասել է Վահրամ Դումանյանը: 

Դեսպան Ժոնաթան Լաքոտը, շնորհակալություն հայտնելով ընդունելության համար, վերահաստատել է համագործակցության շարունակության պատրաստակամությունը. «Մարտահրավերներին դիմակայելու լավագույն միջոցը կրթությունն է, որը հայ-ֆրանսիական հարաբերություններում առանցքային ոլորտ է: Դրա ակնառու դրսեւորումներից են Անատոլ Ֆրանսի անվան ֆրանսիական կրթահամալիրը եւ Հայաստանում ֆրանսիական համալսարանը: Կրթահամալիրի բացումը նախատեսվում է մինչեւ ամառային արձակուրդը. համոզված ենք՝ այն կլինի աշխարհի ամենագեղեցիկ ֆրանսիական կրթահամալիրներից մեկը: Ինչպես կասեր Շառլ Ազնավուրը՝ մենք ունենք կրթահամալիր, որը 100 տոկոսով հայկական է եւ 100 տոկոսով ֆրանսիական»:

Ժոնաթան Լաքոտը նախարար Վահրամ Դումանյանին հայտնել է Հայաստանում ֆրանսիական համալսարանը միջազգային դարձնելու մտադրությունը՝ նշելով, որ այն կարող է դառնալ Կովկասում ֆրանկոֆոն միջազգային համալսարան: ԿԳՄՍ նախարարը կարեւորել է մեր երկրում այդ համալսարանի գործունեությունը եւ դրա ընդլայնմանն ու զարգացմանն աջակցելու պատրաստակամություն հայտնել:

Հանդիպման օրակարգում է եղել նաեւ Ադրբեջանի վերահսկողության ներքո գտնվող տարածքներում հայկական մշակութային ժառանգության պահպանության հարցը:

«Մենք կարեւորում ենք Ֆրանսիայի աջակցությունը եւ դերակատարումը հայկական նյութական եւ ոչ նյութական մշակութային ժառանգության պահպանման նախաձեռնություններում: Այդ ժառանգությունը ոչ միայն հայկական է, այլեւ համամարդկային»,- ընդգծել է ԿԳՄՍ նախարարը:

Դեսպան Ժոնաթան Լաքոտն արձագանքել է, որ հարցը ֆրանսիական կողմի ուշադրության կենտրոնում է. «Քաջատեղյակ ենք այդ ցավոտ խնդրին: Դեռեւս նոյեմբերին Ֆրանսիայի Հանրապետության նախագահ Էմանուել Մակրոնը հրավիրեց ժողով, որի ընթացքում քննարկվեց պատմամշակութային, հոգեւոր արժեքների պահպանման հարցը: Այս տեսանկյունից մեզ համար կարեւոր է ինչպես ՅՈՒՆԵՍԿՕ-ի հետ աշխատանքը, այնպես էլ երկկողմ համագործակցությունը: Կա հայկական պատմամշակութային ժառանգության վերափոխման վտանգ, ուստի կարեւոր է՝ ներկա փուլում Ադրբեջանը զգա, որ գտնվում է հսկողության ներքո»:

Հանդիպման ընթացքում քննարկվել են նաեւ միջբուհական համագործակցության զարգացմանը, մշակույթի ոլորտի մասնագետների վերապատրաստմանը, Erasmus+ համատեղ ծրագրերի իրականացմանը վերաբերող եւ երկկողմ հետաքրքրություն ներկայացնող այլ հարցեր:

 

Աղբյուր՝ news.am

219