Այսօր վարչապետ Նիկոլ Փաշինյանը ԵԱՏՄ գագաթնաժողովին նշել է, որ Եվրասիական տնտեսական միությունը չպիտի հետ մնա համաշխարհային զարգացումներից: Իր ելույթում նա մասնավորապես ասել է.
«ԵԱՏՄ-ում էլեկտրամոբիլների շուկայի ձևավորման համար պայմանների ստեղծումը բխում է տնտեսական անվտանգության և հանրային առողջության շահերից: Սա նաև կնպաստի նոր տեխնոլոգիաների ավելի լայն ներդրմանը և ազգային տնտեսությունների արդիականացմանը, կբարձրացնի գիտելիք պահանջող արդյունաբերությունների ներգրավվածության մակարդակը»,-ավելացրել է նա:
Նա նաեւ կարևորել է ԵԱՏՄ երկրներում էկոլոգիապես մաքուր տրանսպորտի զարգացումը: Փաշինյանն արձանագրել է, որ համաշխարհային հանրության առջև ծառացած խնդիրներից մեկն այսօր կապված է կլիմայի փոփոխության հետ:
«Դա ազդում է ոչ միայն տնտեսության, այլև սոցիալական գործընթացների վրա: Այս առումով անհրաժեշտ է ԵԱՏՄ անդամ երկրների փոխազդեցություն՝ կլիմայի փոփոխության հետևանքները մեղմելու միջոցառումներ մշակելու համար»,- նշել է ՀՀ վարչապետը։
ՀՀ վարչապետն առաջարկել է ուժեղացնել այս ուղղությամբ աշխատանքը` դրանում ավելի ակտիվորեն ներգրավելով գործարար համայնքին և գիտական շրջանակներին:
Լյուսիյա Պետրոսյան