Թուրքական լիրան դեկտեմբերի 17-ին սակարկությունների ժամանակ շարունակել է կտրուկ անկումը ամերիկյան արժույթի նկատմամբ։ Սակարկությունների ընթացքում դոլարի փոխարժեքն աճել է ավելի քան 2,3%-ով՝ առաջին անգամ բարձրանալով 16 լիրայից՝ Մոսկվայի ժամանակով 9:31-ի դրությամբ մեկ դոլարի դիմաց կազմելով մինչեւ 16,034 լիրա: Այս մասին տեղեկանում ենք rbc.ru -ից։

Հինգշաբթի դոլարի փոխարժեքը թուրքական արժույթի նկատմամբ առաջին անգամ գերազանցել է 15 լիրան մեկ դոլարի դիմաց։ Լիրայի անկումն արագացել է դեկտեմբերի 16-ին Թուրքիայի Կենտրոնական բանկի նիստից հետո, որի ընթացքում ԿԲ-ն նվազեցրել է 100 բազիսային կետով տոկոսադրույքը՝ 15 տոկոսից հասցնելով 14 տոկոսի:

Թուրքիայի նախագահ Ռեջեփ Թայիփ Էրդողանը դեմ է բարձր տոկոսադրույքներին՝ կարծելով, որ դրանք խթանում են գնաճը, այլ ոչ թե զսպում այն:  Էրդողանը կարծում է, որ փոխարժեքի նվազումն անհրաժեշտ է Թուրքիայում տնտեսության աճի, արտահանման եւ վարկավորման խթանման համար:

Երկրում շարունակվում է դրամավարկային քաղաքականության մեղմացման ցիկլը, չնայած այն բանին, որ աշխարհի ԿԲ-ների մեծամասնությունը խստացնում է իր քաղաքականությունը։ 2021 թվականի սեպտեմբերից Թուրքիայի Կենտրոնական բանկը 19%-ից նվազեցրել է առանցքային տոկոսադրույքը՝ հասցնելով 14%-ի: Նոյեմբերի պաշտոնական տվյալները ցույց են տվել, որ Թուրքիայում գնաճը հասել է 21,3 տոկոսի՝ 5 տոկոս նպատակային ցուցանիշի դիմաց:

Երկու շաբաթ առաջ Թուրքիայի նախագահը ֆինանսների նոր նախարար է նշանակել Նուրեդդին Նեբաթիին, որն աջակցում է ցածր տոկոսադրույքների քաղաքականությանը։ Չորեքշաբթի օրը լիրայի ռեկորդային անկման ֆոնին Էրդողանը պաշտոնանկ է արել ֆինանսների նախարարի երկու տեղակալներին։

Այս շաբաթ երկրի ֆինանսների նոր նախարարը հայտարարել է, որ Կենտրոնական բանկը չի բարձրացնի տոկոսադրույքները, եւ իր աջակցությունն է հայտնել երկրի նախագահին, որը հանդես է գալիս տոկոսադրույքների հետագա կրճատման օգտին: Վերջին երկու շաբաթվա ընթացքում Կենտրոնական բանկը չորս անգամ ինտերվենցիաներ է իրականացրել արժութային շուկայում՝ վաճառելով դոլար, որպեսզի դանդաղեցնի լիրայի վաճառքը։

Տարեսկզբից Թուրքիայի արժույթը երկու անգամ արժեզրկվել է։ Հունվարին դոլարի համար տրվել է 7,3 լիրա: The Wall Street Journal-ի հաշվարկներով՝ սեպտեմբերից, երբ կարգավորիչը սկսել է կրճատել տոկոսադրույքը, թուրքական արժույթը կորցրել է դոլարի նկատմամբ իր արժեքի մոտ 40 տոկոսը, ինչը լիրայում ներդրում է կատարել աշխարհի վատագույն ներդրումներից մեկում:

Մարիամ Գեւորգյան