Թուրք ազգայնական «Գորշ գայլեր» կազմակերպությունը հունական կղզիների նկատմամբ հավակնություններով քարտեզի հրապարակումից հետո Twitter-ի իրենց միկրոբլոգում հայտարարել է, որ Կրետեն «Թուրքիայի անբաժան մասն է»։
Հիշեցնենք, որ Թուրքիայի նախագահական կոալիցիոն գործընկեր, «Ազգայնական շարժում» կուսակցության (MHP) առաջնորդ Դևլեթ Բահչելին շաբաթ օրն այցելել է «Գորշ գայլերի» շտաբ և լուսանկարվել քարտեզի կողքին, որտեղ երևում է, որ Էգեյան ծովի և Կրետեի կեսը Թուրքիային են պատկանում:
Հունաստանի դիվանագիտական աղբյուրները դատապարտել են Բահչելիի կողմից քարտեզի ցուցադրումը, որը կասկածի տակ է դնում Հունաստանի ինքնիշխանությունը Էգեյան ծովի կղզիների և Կրետեի նկատմամբ՝ ասելով, որ «սա Թուրքիայի կողմից ծայրահեղ հռետորաբանության սրման մի մասն է»:
Հունաստանի վարչապետ Կիրիակոս Միցոտակիսն ասել է, որ ակնկալում է, որ Թուրքիայի նախագահ Թայիփ Էդողանը կհայտնի «հստակ դիրքորոշում» «կրտսեր կոալիցիոն գործընկերոջ հնարքի» և այն մասին, թե արդյոք հունական կղզիների նկատմամբ տարածքային պահանջները Թուրքիայի պաշտոնական քաղաքականությունն են:
«Գորշ գայլերը» ութ թվիթ է հրապարակել հունարենով, որտեղ ասվում է, որ քարտեզը սահմանել է սահմաններ և նշել կղզիներ «որտեղ հարյուրավոր տարիներ ծածանվել է թուրքական փառահեղ դրոշը», և որոնք «անօրինական կերպով յուրացվել են Հունաստանի կողմից»: Ազգայնականները պնդում են, որ 152 կղզի չի զիջվել Հունաստանին Լոզանի ու Փարիզի պայմանագրերի համաձայն։