Լեռնային Ղարաբաղում մարտերը սկսվել են ընդամենը շաբաթներ անց այն բանից հետո, երբ Եվրահանձնաժողովի նախագահ Ուրսուլա ֆոն դեր Լեյենը այցելեց Բաքու և ստորագրեց նոր երկկողմ համաձայնագիր, որի նպատակն է կրկնապատկել ադրբեջանական գազի ներմուծումը ԵՄ:
Ադրբեջանը Ռուսաստանից Եվրոպայի էներգետիկ կախվածությունը հաղթահարելու միջոցներից է։ Չնայած գազի ներմուծման խթանման մասին բոլոր ոգևորված խոսակցություններին, այս նպատակները ներկայումս անիրատեսական են, հատկապես՝ Ռուսաստանի կողմից չվերահսկվող ազատ խողովակաշարի թողունակության բացակայության պատճառով:
Արևմտյան էներգետիկ ներդրումները առանցքային նշանակություն ունեն Ադրբեջանի՝ ռեժիմն ամրապնդելու և Մոսկվայից անկախությունը պահպանելու ջանքերում, մի մոտեցում, որն առաջ է քաշել Ալիևի հայրն ու նախորդը՝ Հեյդար Ալիևը, և շարունակվել է կրտսեր Ալիևի կողմից:
Մինչ Ադրբեջանը ձգտում է Հայաստանը ներկայացնել որպես Ռուսաստանի ենթարկվող պետություն, Փաշինյանը պահպանում է Հայաստանի չեզոքությունը Ուկրաինայի նկատմամբ։ Մյուս կողմից, Ալիևը, որը ստանձնել է «Եվրոպայի էներգետիկ փրկչի» դերը, միևնույն ժամանակ, Պուտինի «ԼԺՀ»-ն և «ԴԺՀ»-ն ճանաչելուց մեկ օր անց՝ փետրվարի 22-ին, ստորագրեց «դաշնակցային համագործակցության մասին հռչակագիրը»։
Լեռնային Ղարաբաղի շուրջ 2020-ի հայ-ադրբեջանական արյունալի պատերազմից երկու տարի չանցած, ռազմական գործողությունների բռնկումը նշան է, որ Արևմուտքի մոտեցումն Ադրբեջանի նկատմամբ ձախողվում է։ Ալիևի ռեժիմը կարող է լինել Եվրոպայի էներգետիկ օրակարգի կենտրոնում, սակայն նրա կոռուպցիան և անօրինականության կամայականությունը սուր քննադատության են ենթարկվում Արևմուտքում։
Վերջին շրջանում խոշոր էներգետիկ ընկերությունները փաստացի փորձում են դուրս գալ Ադրբեջանից։ Այսօր Ադրբեջանը բախվում է մատակարարման ներքին սահմանափակումների։ Վերջին տարիներին 1990-ականներից ի վեր գրանցվել է էլեկտրաէներգիայի անջատումների աննախադեպ աճ: Քանի որ երկրի էլեկտրաէներգիայի 90%-ը ստացվում է գազից, սա լավ բան չի խոստանում գազի արտահանման ծրագրերի մասին:
Բանակցային սեղանին որևէ ծրագիր չկա՝ իրականացնելու ֆոն դեր Լեյենի՝ ադրբեջանական գազի ներկրումը ավելի քան կրկնապատկելու խոստումը, ինչի արդյունքում լավագույն դեպքում գործարքը կդառնա «թղթե վագր»: