Հայաստանում 2024 թվականի հունվարից բնակարանների ստվերային հանձնման համար ստիպված կլինեն տուգանք վճարել:

Պատասխանատվություն է սահմանվում այն դեպքերի համար, երբ օպերատիվ հետախուզական միջոցառումների ընթացքում կհայտնաբերվեն այնպիսի դեպքեր, երբ գույքը հանձնվում է վարձակալության, կամ պետական գրանցում չի ստացել այդ վարձակալության գործարքը, կամ նախապես հարկային մարմին հայտարարություն չի ներկայացվել ֆիզիկական անձի կողմից վարձակալության գործարքի առկայության վերաբերյալ,- այսօր ՀՀ ԱԺ տնտեսական հարցերի մշտական հանձնաժողովի հերթական նիստին  ՊԵԿ նախագահի տեղակալ Կարեն Թամազյանը ներակայացրել է Հարկային օրենսգրքում նախատեսվող փոփոխությունները:

Թամազյանը նկատում է` վարձակալության շուկան բավականին ակտիվ է, ինչը նա պայմանավորեց օտարերկրյա քաղաքացիների ՀՀ-ում երկարաժամկետ բնակությամբ: ՊԵԿ նախագահի տեղակալի խոսքով, սակայն, առկա ցուցանիշներն այնքան էլ չեն վկայում, որ վարձատու ֆիզիկական անձինք հայտարարագրում են եկամուտները:

«Օր.` 2021թ.-ին տարեկան հայտարարագիր ներկայացրած վարձակալության գծով եկամուտ հայտարարագրած քաղաքացիների քանակը 4150 է, իսկ 2022.թ-ին գրեթե նույն քանակը՝ 4185, իսկ ինչպես հայտնի է՝ 2022թ.-ին բավականին մեծ վարձակալների տեմպ է եղել»,- նշել է Թամազյանը:

Օրինագծի համաձայն՝ ստվերային վարձակալության համար պետք է տուգանք վճարել բնակարանների կադաստրային արժեքի 5 տոկոսի չափով։ Սակայն խոսքը չի կարող լինել 500 հազար դրամից ավելի գումարի մասին։ Ընդ որում, կրկնակի խախտման դեպքում տուգանքը կարող է ավելանալ մինչեւ 10% (ոչ ավելի, քան 1 մլն դրամ)։  

Համեմատաբար կարճատեւ քննարկումից հետո օրենսդրական նախաձեռնությունը ստացավ խորհրդարանական հանձնաժողովի դրական եզրակացությունը: