«Մեր թշնամիները մոբիլիզացվել են»,- այս մասին ասել է Մեծ Բրիտանիայի պաշտպանության նախարար Գրանտ Շափսը։
Նա հիշեցրել է, որ 2014 թվականին Ղրիմի անօրինական բռնակցումից ութ տարի անց Պուտինը դաժան պատերազմ սկսեց Ուկրաինայի դեմ։
«Մինչ Ռուսաստանը շարունակում է իր անօրինական արշավն Ուկրաինայում, Չինաստանը փորձում է, թե արդյոք Արևմուտքի համբերությունը սպառվելու է: Այսօր Ռուսաստանն ու Չինաստանը միջուկային նոր հնարավորություններ են ձեռք բերել։ Հյուսիսային Կորեան խոստանում է ընդլայնել իր միջուկային զինանոցը. կա նաև Իրան, որն ունի 83,7 տոկոս հարստացված ուրան, այսինքն՝ մակարդակ, որը չի ծառայում քաղաքացիական նպատակներին»,- ընդգծել է նախարարը։
«Մենք տեսնում ենք, որ Իրանի վստահված անձինք ոճրագործություններ են կատարում Իսրայելից մինչև Կարմիր ծով: Ռուսաստանը Չինաստանի հետ իր գործընկերությունն անվանում է «անսահման» և պարբերաբար համատեղ զորավարժություններ է անցկացնում։ Բացի այդ, Պուտինը հույսը դնում է իրանական անօդաչու թռչող սարքերի և հյուսիսկորեական բալիստիկ հրթիռների վրա՝ Ուկրաինայի դեմ անօրինական հարձակումների էսկալացիայի համար: Երբ ունես այդպիսի ընկերներ, աշխարհն ավելի վտանգավոր է դառնում, ինչն էլ տեղի է ունեցել վերջին մի քանի տարիներին»,- իր ելույթում ասել է Մեծ Բրիտանիայի պաշտպանության նախարարը։