Յուրաքանչյուր երազանքի հետևում կանգնած է երազողը։  Gumuchian ընկերության հիմնադիրներ Գումուչյանները այսպես են մեկնաբանում իրենց մեծ ձեռքբերումները ոսկերչության ասպարեզում։

Անիտա Գումուչյանը համաշխարհային ոսկերչության մեջ ևս մի հայտնի հայ է, որն իր դուստրերի հետ ստեղծեց Gumuchian բրենդը։

Հաջողակ ոսկերչական բիզնես հիմնելն ու գործարկելը պահանջում է դիզայներական հնարամտություն, քաջություն և խիզախություն: Անիտա Գումուչյանը, որը 1979 թվականին Մանհեթենի կենտրոնում հիմնեց շքեղ ոսկերչական Gumuchian ընկերությունը, մարմնավորել է այդ բոլոր հատկանիշները՝ այն ժամանակ, երբ ոսկերչական արդյունաբերության մեջ գերիշխում էին տղամարդիկ:

Այնուամենայնիվ, Gumuchian-ի շքեղ, նորարարական նմուշների տարածմանը մեծապես նպասել է  նրա դուստրերի՝ Միրիամ և Պատրիսիա Գումուչյանների գեղարվեստական ​​և բիզնես ղեկավարությունը, ովքեր այժմ իրենց զարդերը վաճառում են Միացյալ Նահանգների ավելի քան 100 մանրածախ վայրերում: Վերջին 40 տարիների ընթացքում ապրանքանիշը հարստացել է նրանց դիզայնի, որակի և  յուրահատուկ երևակայության շնորհիվ:

Միրիամ Գումուչյանը այսօր Հայկական ոսկերչության համաշխարհային կազմակերպության անդամ է։ «Ունենալով մեծ փորձ որպես Gumuchian-ի համասեփականատեր՝ Միրիամը փորձի և նորարարության  յուրահատուկ համադրություն է բերում մեր խմբին»,- ասվում է կազմակերպության հայտարարության մեջ։

Gumuchian-ը հեղինակավոր համբավի, արհեստավարժ վարպետության և պատրաստած զարդերի շնորհիվ  Նյու Յորքի քաղաքապետարանի կողմից ստացել է բաղձալի «Պատրաստված է Նյու Յորքում» մրցանակը: Gumuchian պարգևատրվել է նաև  կորպորատիվ մրցանակով, որը շնորհվում է այն ընկերություններին, որոնք ցույց են տալիս ակնառու նվիրվածություն կանանց կարիերան առաջ մղելու գործում։

Գումուչյանը ավելի քան 20 տարբեր հավաքածուներ է արտադրում  Նյու Յորքի իրենց ատելյեում` փորձառու ոսկերիչների ամենահմուտ թիմով, որոնք յուրաքանչյուրը զարդը ստեղծում են ձեռքով: Հավաքածուները բաղկացած են 18 կարատանոց ոսկուց, պլատինից, ադամանդներից, մարգարիտներից և գունավոր քարերից։

Gumuchian -ի բարձրորակ դասական, ռոմանտիկ և ընտանեկան ստեղծագործությունները, որոնք ստեղծվել են սերունդների համար, ունեն անժամկետ ոճ, տեխնիկական նրբություն և զարդերի մաքուր գեղեցկություն:

Իրենց մեծ հռչակին զուգահեռ՝ նրանք շեշտում են իրենց հայկական արմատների մասին։ Հարցին, թե  ինչու են Ամերիկայի լավագույն ոսկերչական դիզայներների մի մասը հայեր կամ հայկական ծագումով և ինչո՞ւ են նրանք այդքան տաղանդավոր զարդեր պատրաստելու գործում, Գումուչյանները նշել են, որ որոշ արհեստներ փոխանցվում են սերնդեսերունդ: Զարդեր պատրաստելը հմտություն է, որը պահանջում է մեծ համբերություն և պրակտիկա, իսկ հայերը սիրում են զարդեր և կրքով են այն ստեղծում:

Անհնար էր, որ նրանց ոսկերչական աշխատանքների վրա ազդեցություն չունենար հայկական մշակույթը։

«Հայկական ավանդական ոսկյա զարդերը աշխատատար արհեստագործական արվեստի մաս են: Մեր որոշ աշխատանքներում դեռ օգտագործում ենք ոսկու մշակման նույն տեխնիկան, ինչպիսին է, օրինակ, մեր ձեռքի մուրճը: Դիզայնի վրա նույնպես ազդում են մեր արմատները: Օրինակ, Nutmeg հավաքածուից մատանիները և Ring Cycle մատանին, որը վերածվում է ապարանջանի, սրանք բոլորը ոգեշնչված են զարդերից, որոնք մենք տեսել ենք մեր երիտասարդության տարիներին»,- նշում են նրանք։

Նրանք պատմում են, որ այս ոճի մատանիները սուլթանը նվիրել է իր հարեմի սիրելիին, բայց դրանք պատրաստվել են նաև հայ ոսկերիչների կողմից:

Որոշ յուրահատուկ զարդեր, որոնք գրավել են ոսկերչության մեջ իրենց տեղը.