Չինաստանի արտաքին գործերի նախարարության խոսնակ Լին Ցզյանը հայտարարել է, որ Պեկինը դադարեցրել է սպառազինությունների վերահսկման վերաբերյալ խորհրդակցությունները Վաշինգտոնի հետ: Պատճառը, ինչպես պարզաբանել է դիվանագետը, ամերիկյան զենքի վաճառքն էր Թայվանին։

«Ամերիկյան կողմը, անտեսելով ուժեղ բողոքները, շարունակեց զենք վաճառել Թայվանին՝ ձեռնարկելով մի շարք գործողություններ, որոնք լրջորեն խախտում են Չինաստանի հիմնական շահերը և քայքայում երկկողմ քաղաքական փոխվստահությունը»,- ասել է Լին Ցզյանը ճեպազրույցում։

Արտաքին գործերի նախարարության խոսնակը հավելել է, որ Պեկինը Վաշինգտոնին պատասխանատու է համարում ստեղծված իրավիճակի համար։ Նրա խոսքով, Չինաստանը պատրաստ է պահպանել փոխգործակցությունը ԱՄՆ-ի հետ, սակայն հարգելով Պեկինի հիմնարար շահերը։