Վանաձորի քիմպրոմ գործարանի պայթունավտանգ լինելն արդեն մի քանի օր է՝ քննարկվում է:

Մտավախություն կա, որ Բեյրութի նավահանգստային գոտում տեղի ունեցած հզոր պայթյունների պատճառը՝ 2750 տոննա ամոնիակի սելիտրան, կտեսնենք նաև քիմպրոմում: 

Araratnews.am-ը Վանաձորի քաղաքապետ Մամիկոն Ասլանյանին հարցրեց՝  արդյոք անհանգստանալու կարիք կա: «Որեւէ մեկը կոմպետենտ անձանցից ստույգ տեղեկություն չունի գործարանի քիմպրոմի ամոնիակի քանակի  վերաբերյալ: Ենթադրում են՝ կա  2  պահեստարան 60 տոննանոց ամոնիակ: Բայց  չափիչ սարքերը չեն աշխատում, հետևաբար ոչ ոք չգիտի պարունակությունը»,- ասաց քաղաքապետը: 

Քաղաքապետը հիշեցնում է՝ ամոնիակը տաքացման հետեւանքով կարող է գոլորշիանալ ու վտանգավոր լինել: 

Արտակարգ իրավիճակների մասնագետները (ԱԻՆ) եղել են գործարանում, բայց քաղաքապետի կարծիքով՝ կարիք կա այլ մասնագետների:

Քաղաքապետը կարծում է՝  գործարանի պայթունավտանգ լինելը խոսակցություն է: «Զգուշությունը լավ բան է: Օր առաջ պետք է խնդիրը լուծել: Բայց որ ասեմ՝ վառոդի տակառի վրա ենք, չափազանցված է»,- կարծում է պաշտոնյան:  

Լուծումը, ըստ Մամիկոն Ասլանյանի, այն է, որ ամոնիակը պետք է  տեղափոխվի անվտանգ վայր, քիչ քանակով օդ բաց թողնվի,  ինչպես անում էին ԽՍՀՄ տարիներին, չնայած Հայաստանում ամոնիակ տեղափոխող  շատ մեքենաներ չկան: 

Հիշեցնենք՝ «Վանաձոր-Քիմպրոմ» ՓԲԸ-ն լուծարվել է: Գործարանի մի մասը մասնավոր է, մի մասը բանկում է գրավադրված: 

Դեռ 2012 թ-ի հունվարի 12-ին, առավոտյան ժամը 09:40-ին, «Վանաձոր Քիմպրոմ»-ի գազի արտադրամասում ամոնիակի տարայի պայթյունի հետևանքով արտադրամասի ապարատավար, 1990 թ. ծնված Դ. Ասատրյանը ստացած վնասվածքներից տեղում մահացել էր, եւս 3 աշատակից տարբեր աստիճանի վնասվածքներով տեղափոխվել էին հիվանդանոց: 

Սոնա Դավթյան