Բաժանորդագրվեք araratnews-ի տելեգրամ ալիքին։
ՆԳՆ ոստիկանության պետ-ՆԳ նախարարի տեղակալ Ոստիկանության գեներալ-մայոր Արամ Հովհաննիսյանը շնորհավորական ուղերձ է հղել Ոստիկանության տոնի առթիվ։ Դրանում ասված է․
«Սիրելի՛ ոստիկաններ, շնորհավորում եմ բոլորիս մասնագիտական տոնի առթիվ: Լինելով պետականության հիմնասյուներից մեկը՝ Ոստիկանությունը մշտապես առաջին գծում է՝ հանուն օրենքի և օրինականության, հանուն հասարակական կարգի պահպանման, հանուն ժողովրդի անվտանգության ու բարօրության:
Ոստիկանությունը բազմիցս է առերեսվել ամենաբարդ իրավիճակների, որոնցից միշտ դուրս է եկել առավել կոփված, առավել պրոֆեսիոնալ ու առավել պատասխանատու: Ոստիկանության հարյուրավոր ծառայողներ նաև իրենց անձնազոհությամբ են հավաստել Հայրենիքի, պետության հանդեպ հավատարմությունն ու պատրաստակամությունը:
Ժամանակի հրամայականին ընդառաջ՝ վերջին տարիներին Ոստիկանությունը պատվով անցավ և շարունակում է անցնել արմատական բարեփոխումների ճանապարհ, որի նպատակը արհեստավարժ Ոստիկանություն ունենալն է: Մենք հետևողականորեն շարունակելու ենք այդ ճանապարհը՝ նոր որակով ու պատրաստվածությամբ իրականացնելու ծառայությունը օրենքին ու մեր քաղաքացիներին, դիմակայելու ժամանակի առաջադրած մարտահրավերներին։
Հենց այդ առաջնահերթություններն են Ոստիկանության հենասյունային չորս ուղղությունների՝ Քրեական ոստիկանության, Պարեկային ծառայության, Համայնքային ոստիկանության և Ոստիկանության գվարդիայի հիմքում։
Սիրելի՛ ոստիկաններ, ցանկանում եմ երախտիքս հայտնել ձեզ: Յուրաքանչյուրիդ ներդրած ջանքերի և սրտացավության շնորհիվ է, որ իրականություն են դառնում ժամանակակից մարտահրավերներին դիմակայող, բարեվարք Ոստիկանություն ունենալու մեր ջանքերը:
Հիշե՛ք, ձեզնից յուրաքանչյուրի աշխատանքի արդյունքով է գնահատվում Ոստիկանությունը, ձեզնից յուրաքանչյուրի աշխատանքի արդյունքով է գնահատվում նաև մեր պետությունը՝ Հայաստանի Հանրապետությունը։ Եղե՛ք ձեր կոչմանն արժանի և հավատարիմ։ Արժանապատիվ և անփորձանք ծառայություն եմ մաղթում բոլորիդ:
Շնորհակալությու՛ն ոստիկանության վետերաններին: Հավե՛րժ փառք ծառայողական պարտականությունները կատարելիս և հայրենիքի սահմանների պաշտպանության ժամանակ զոհված մեր գործընկերներին»: