Բաժանորդագրվեք araratnews-ի տելեգրամ ալիքին։
Հայաստանի հանքարդյունաբերության և մետալուրգիայի ասոցիացիայի (ՀՀՄԱ) տարեկան հաշվետու համաժողովի շրջանակում տեղի է ունեցել երկու կարևոր հուշագրերի ստորագրում, որոնք ուղղված են ոլորտային համագործակցության ամրապնդմանը, ինստիտուցիոնալ կարողությունների զարգացմանը և համատեղ նախաձեռնությունների իրականացման խթանմանը։
Առաջին հուշագիրը ստորագրվել է ՀՀ տարածքային կառավարման և ենթակառուցվածքների նախարարության, ի դեմս նախարար Դավիթ Խուդաթյանի և ՀՀՄԱ-ի՝ ի դեմս նախագահ Վարդան Ջհանյանի միջև։
Այն նպատակ ունի խորացնելու ոլորտային համագործակցությունը, կատարելագործելու փոխգործակցության մեխանիզմները և ապահովելու հանքարդյունաբերության ոլորտի կայուն զարգացմանն ուղղված քաղաքականությունների ավելի արդյունավետ համակարգում։
Փաստաթուղթը նախատեսում է համատեղ աշխատանքների ընդլայնում՝ ներառյալ ոլորտային խնդիրների քննարկումը, քաղաքականությունների մշակման գործընթացում համագործակցությունը և զարգացման երկարաժամկետ ծրագրերի համատեղ իրականացումը։
Երկրորդ հուշագիրը կնքվել է Հայաստանի երկրաբանների միության և ՀՀՄԱ-ի միջև։ Այն ուղղված է երկրաբանական և հանքարդյունաբերական ոլորտների միջև մասնագիտական համագործակցության խորացմանը, գիտատեխնիկական ներուժի համադրմանը և փորձի փոխանակման ընդլայնմանը։
Հուշագրով նախատեսվում է նաև երկրաբանական ուսումնասիրությունների և արդյունաբերական կիրառությունների միջև կապի ամրապնդում՝ նպաստելով ոլորտի գիտահենք զարգացմանը։
Հուշագրերի ստորագրումը դիտարկվում է որպես կարևոր քայլ՝ ուղղված ոլորտի ինստիտուցիոնալ հիմքերի ամրապնդմանը, մասնագիտական համագործակցության ընդլայնմանը և Հայաստանի հանքարդյունաբերության ոլորտի միջազգային մրցունակության բարձրացմանը։