Շուշիի շրջանի Եղցահող համայնքը վերջին օրերին հայտնվել է լրատվամիջոցների ուշադրության կենտրոնում, նախ՝ ադրբեջանական զորքերի թիրախային կրակոցների, ապա նշված տարածքից մեր զորքերի դուրսբերման մասին հայկական մամուլում շրջանառվող լուրերի պատճառով: Սակայն հայկական զինվորական ստորաբաժանումները նշված տարածքից դուրս չեն եկել:
Այս մասին «Արցախպրես»-ի հետ զրույցում հայտնել է ռազմական փորձագետ Վլադիմիր Հարությունյանը:
«Իրականում ուզում եմ վստահեցնել, որ Եղցահողի հատվածում մենք որևէ տագնապալի իրավիճակ չունենք: Ընդհակառակը՝ օրեր առաջ տարածքում ամրացել են ռուսական խաղաղապահ զորքերը, իսկ մեր զորամիավորումներն այնտեղից դուրս չեն եկել, այլ վերախմբավորվել են: Շփման գծում գուցե ինչ-որ գործընթացներ տեղի են ունեցել, սակայն վստահեցնում եմ, որ դրանց արդյունքում մենք ոչ մի տարածքային կորուստ չենք ունեցել: Ավելին, այդ գործընթացները նպաստելու են տվյալ ենթաշրջանում լարվածության թուլացմանը և անվտանգության մակարդակի բարձրացմանը, քանի որ մեր զորամիավորումների կողմից տեղում մի շարք քայլեր են կատարվում, և նմանատիպ գործողություններ իրականացնում են նաև ադրբեջանական զինված ուժերի կողմից:», - նշել է Վլադիմիր Հարությունյանը:
Ռազմական փորձագետի խոսքով՝ բնականաբար, բոլոր այս գործընթացները տեղի են ունենում ռուս խաղաղապահերի միջնորդությամբ:
Լուսանկարը՝ Hetq.am-ի