Առողջապահության համաշխարհային կազմակերպության ղեկավար Թեդրոս Ադանոմ Գեբրեյեսուսը նախազգուշացրել է միջազգային հանրությանը ապագայում նոր վտանգավոր վիրուսի հայտնվելու մասին և կոչ արել դասեր քաղել կորոնավիրուսային պանդեմիայից։ Այս մասին նա հայտարարել է Հռոմում՝ G20-ի առողջապահության և ֆինանսների նախարարների հանդիպմանը։

«Նույնիսկ եթե մենք վերջ դնենք այս պանդեմիային, մենք պետք է դասեր քաղենք և նախապատրաստվենք հաջորդին»,-ասել է նա։
ԱՀԿ ղեկավարը հիշեցրել է, որ աշխարհում չկա հավասարություն պատվաստանյութերի հասանելիության հարցում։ Ներկայում լիարժեք պատվաստված է մոլորակի բնակչության միայն 36 տոկոսը, Աֆրիկայում այդ ցուցանիշն ընդամենը 6 տոկոս է։

Ապագայում սպառնալիքների դեմ համատեղ պայքարելու համար ԱՀԿ ղեկավարը կոչ է արել Մեծ քսանյակի երկրների առաջնորդներին աջակցել պանդեմիաներին նախապատրաստվելու և արձագանքելու՝ իրավաբանորեն պարտավորեցնող միջազգային համաձայնագրի կնքմանը։ Դրա վերաբերյալ որոշումը ծրագրվում է ընդունել նոյեմբերին կայանալիք Առողջապահության համաշխարհային վեհաժողովի հատուկ նիստում։

2775