Ռուսաստանի արտաքին գործերի նախարար Սերգեյ Լավրովը մեկնաբանել է ԱՄՆ-ի արձագանքը Ռուսաստանի՝ անվտանգության երաշխիքների վերաբերյալ առաջարկին։ Նա հայտարարել է, որ փաստաթղթի բովանդակությունը «թույլ է տալիս հույս դնել լուրջ երկխոսության մեկնարկի, բայց երկրորդական հարցերի վրա»։ Լավրովի խոսքով, ԵԱՀԿ Ստամբուլի և Աստանայի հռչակագրերում արձանագրված է որևէ երկրի պարտավորությունը «չուժեղացնելու իր անվտանգությունը այլ պետությունների անվտանգության հաշվին», սակայն արևմտյան գործընկերները չեն նշում այդ փաստաթղթերը, շրջանցում են դրանք և «դիտավորյալ լռում են այս սկզբունքի մասին»: Ռուսաստանը պաշտոնական հարցումներ կուղարկի ստորագրող երկրներին, թե ինչու են նրանք անտեսում այդ դրույթները: