Երևան քաղաքի կենտրոնում այժմ էլ գործում է Ալբերտ Ազարյանի անվան մարզադպրոցը և խնդիր էր, թե ինչպես անել, որ այդ մարզադպրոցը համապատասխանի ժամանակակից ստանդարտներին: Այս մասին այսօր կառավարության հերթական նիստին ասաց ՀՀ վարչապետ Նիկոլ Փաշինյանը:
«Բոլոր ուսումնասիրությունները ցույց տվեցին, որ նույն տարածքում հնարավոր չէ այնպես վերակառուցել, որ այդ դպրոցը համապատասխանի միջազգային ժամանակակից ստանդարտներին, և մենք գնացինք ոչ թե վերակառուցման ճանապարհով, այլ զրոյից կառուցելու Ալբերտ Ազարյանի անվան մարզադպրոցը»,- ասաց նա և նշեց, որ արդեն նախագիծը կա, հիմա հատկացնում են տարածքը:
Վարչապետը հայտնեց նաև, որ Հայաստանը նվաճել է 2027 թվականին մարմնամարզության Եվրոպայի առաջնություն իրականացնելու իրավունքը. ըստ ծրագրածի՝ մարզադպրոցը շահագործման կհանձնվի մինչ այդ:
ՀՀ վարչապետն ընդգծեց նաև, որ ավարտին է մոտենում Հրանտ Շահինյանի անվան մարզադպրոցի կառուցումը, աշխատանքներ են իրականացվում Խորեն Հովհաննիսյանի անվան ֆուտբոլի դպրոց, Արթուր Ալեքսանյանի, Սիմոն Մարտիրոսյանի, Արթուր Աբրահամյանի անվան մարզադպրոցներ ունենալու համար:
Նախագիծը ներկայացնող Տարածքային կառավարման և ենթակառուցվածքների նախարար Գնել Սանոսյանը նշեց, որ Հրազդանի կիրճի 4 հասցեում է գտնվելու տարածքը՝ Հրազդան մարզադահլիճի հարևանությամբ, «Դալմա» առևտրային կենտրոնի դիմաց: