ԱՄՆ վարչակազմը մասնավոր կերպով Իսրայելին կոչ է անում ռազմական արշավ չսկսել «Հըզբոլլահի» դեմ, քանի որ Վաշինգտոնը փորձում է կանխել ներկայիս պատերազմի տարածումը Գազայի հատվածից այն կողմ, The Times of Israel-ին ասել են երկու պաշտոնյաներ, որոնք «ծանոթ են այդ խնդրին»:

ԱՄՆ-ն ընդունում է, որ Իսրայելը պետք է պատասխան տա «Հըզբոլլահի» հարձակումներին իր հյուսիսային սահմանի վրա հոկտեմբերի 7-ին «Համասի» ցնցող հարձակումից հետո, որի հետևանքով զոհվեց ավելի քան 1400 իսրայելցի, բացատրում են պաշտոնյաները, այսօր հաղորդում է հրեական պետության անգլալեզու հրատարակությունը:

Սակայն լիբանանյան խմբավորման կողմից կրկնվող հարձակումները և Իսրայելի՝ Գազայից «Համասի» հարձակումը կանխատեսելու ձախողումը սաստկացրել են բանավեճը այն մասին, թե արդյոք Իսրայելը «պետք է պայքար տանի «Հըզբոլլահի» դեմ՝ առավելություն պահպանելու համար»,- գրում է թերթը:

Նման խոսակցությունները անհանգստության պատճառ են դարձել Միացյալ Նահանգների համար, որը մասնավոր և հրապարակայնորեն զգուշացրել է «Հըզբոլլահին» և նրա հետևում կանգնած Իրանին, որ պատերազմ չսկսեն Իսրայելի հյուսիսային ճակատում, անանունության պայմանով թերթին ասել են պաշտոնյաները։