Թուրքիայում սոցիալական ցանցերի օգտատերերը քննադատել են երկրի առաջին տիկին Էմինե Էրդողանին ֆրանսիական Hermes ապրանքանիշի 50 000 դոլար արժողությամբ պայուսակ օգտագործելու համար, գրում է ahvalnews.com կայքը։
«Թայիփ Էրդողանի՝ ֆրանսիական ապրանքները բոկոտի մասին կոչերից հետո ակնկալում ենք, որ Էմինե Էրդողանը Թաքսիմ հրապարակում կայրի ֆրանսիական արտադրության իր պայուսակները»,- իր թվիթերյան էջում գրել է թուրք օգտատերերից մեկը։
Հայտնի է, որ նմանատիպ հայտարարություններին արձագանքել է ընդդիմադիր «Ժողովրդահանրապետական կուսակցության» առաջնորդ Քեմալ Քըլըչդարօղլուն, որը նշել է, որ առաջին տիկինն առաջինը պետք է բոյկոտի ֆրանսիական ապրանքները։
Իշխող «Արդարություն և զարգացում» կուսակցության խոսնակն էլ ի պատասխան հայտարարել է, որ նման հորդորը «կնոջ նկատմամբ բռնության օրինակ» է:
Հայտնի է, որ թուրք-ֆրանսիական հարաբերություններում առաջացած լարվածության ֆոնին նախագահ Էրդողանը կոչ էր արել բոյկոտել ֆրանսիական ապրանքները: