Հայաստանի Ազգային ժողովի նախագահ Ալեն Սիմոնյանը Սոֆիայում հանդիպել է Բուլղարիայի նախագահ Ռումեն Ռադևի հետ։ Այս մասին հայտնել է բուլղարական BTA գործակալությունը։  

Նշվում է, որ Բուլղարիայի նախագահն ու Հայաստանի ԱԺ նախագահը համաձայնվել են, որ Բուլղարիան և Հայաստանն ունեն հրաշալի գործընկերություն, ակտիվ և կառուցողական երկխոսություն և երկկողմ տնտեսական և ներդրումային համագործակցության զարգացման ներուժ։  

Ռումեն Ռադևն ընդգծել է Բուլղարիայի շահագրգռվածությունը Հայաստանի հետ առևտրի և ներդրումների խթանման հարցում, ինչպես նաև տարածաշրջանում տրանսպորտային, էներգետիկ և թվային կապերի ընդլայնման կարևորությունը։ Այս համատեքստում Բուլղարիայի նախագանն ընդգծել է հայ-բուլղարական առևտրատնտեսական պալատի գործունեությունը, որը հավելյալ գործիքներ է ներկայացնում երկու երկրների բիզնես շրջանակների համագործակցության համար։

Կողմերը նաև ընդգծել են հայերի և բուլղարացիների բազմադարյա պատմական և մշակութային կապերը, որոնք ամուր հիմք են ուսանողների և հետազոտողների փոխանակման ծրագրերի միջոցով կրթության ոլորտում համագործակցությունը խորացնելու համար։

Ռադևն ընդգծել է Բուլղարիայի մեծաթիվ հայկական համայնքի ակնառու ներդրումը երկկողմ կապերի զարգացման  հարցում և ակտիվ մասնակցությունը Բուլղարիայի սոցիալական, տնտեսական և մշակութային կյանքին։

«Բուլղարիան նաև կշարունակի աշխատել Հայաստանի և Եվրամիության գործընկերությունն ամրապնդելու ուղղությամբ»,- հայտարարել է Բուլղարիայի նախագահը։

Կողմերը քննարկել են նաև ակտուալ հարցեր՝ կապված Հարավային Կովկասում ամուր խաղաղության, անվտանգության և կայունության հետ։

254