Բավարիայի Վյուրցբուրգի համալսարանի գիտնականները Հայաստանում փորձարկում են իրենց երկու ռոբոտները դեպի Մարս ապագա թռիչքների համար, ինչպես նաև նոր տիեզերական հանդերձներ, գրում է գերմանական Bild թերթը։
«Վյուրցբուրգի համալսարանի հետազոտողները Հայաստանում փորձարկում են իրենց երկու ռոբոտները՝ դեպի Մարս թռիչքներ իրականացնելու համար, հետազոտական խումբը մինչև ապրիլի սկիզբը կմնա լոլիկով և ձմերուկով հայտնի Արմաշ գյուղում»,–գրում է թերթը։
Նշվում է նաև, որ երկու կին և չորս տղամարդ կփորձարկեն նոր տեսակի սկաֆանդրներ և դրանց փոխազդեցությունը ռոբոտների հետ լիակատար մեկուսացման պայմաններում։
Ինչպես պարզաբանում է թերթը, առաքելությանը, որը կոչվում է Amadee-24, մասնակցում է ավելի քան 200 գիտնական աշխարհի 26 երկրներից։ Հետազոտության ընթացքում «տիեզերագնացները» մշտական կապի մեջ են սիմուլյացված կառավարման կայանի հետ, որը գործում է Ավստրիայի տիեզերական ֆորումի և Հայաստանի տիեզերական գործակալության կողմից։ Մոտ տասը րոպե փոխանցման ուշացումն արհեստականորեն ներառվել է ռադիոհաղորդումների մեջ՝ այն ավելի մոտեցնելու համար Մարսի առաքելության իրական պայմաններին՝ հաշվի առնելով Երկրի և Մարսի միջև հեռավորությունը:
Պարբերականը նաև վկայակոչում է փորձագիտական կարծիքը, որ մոտ 15 տարի կպահանջվի, մինչև մարդիկ առաջին անգամ ոտք դնեն Մարս։
