Ազգային ժողովի Հայաստան-Շվեդիա բարեկամական խմբի ղեկավար Հռիփսիմե Գրիգորյանն ապրիլի 11-ին հանդիպել է Շվեդիայի արտաքին գործերի նախարարության արեւելյան Եվրոպայի վարչության ղեկավար Էմիլ Գելեբոյի գլխավորած պատվիրակության հետ:

Հանդիպմանը ներկա է եղել ՀՀ-ում Շվեդիայի արտակարգ եւ լիազոր դեսպան Պատրիկ Սվենսոնը:

Ողջունելով հյուրերին` Հռիփսիմե Գրիգորյանն արժեւորել է Շվեդիայի հետ բազմոլորտ համագործակցությունը: Միջխորհրդարանական կապերի խորացման հարցում պատգամավորը կարեւորել է բարեկամական խմբերի արդյունավետ փոխգործակցությունը:

Հանդիպմանն անդրադարձ է եղել նաեւ ՀՀ-ԵՄ շրջանակում հայ-շվեդական համագործակցության ընդլայնմանը:

Բարեկամական խմբի ղեկավարը բարձր է գնահատել Շվեդիայի կառավարության աջակցությունը Հայաստանում ժողովրդավարական բարեփոխումների օրակարգին: Այս համատեքստում Հռիփսիմե Գրիգորյանն ընդգծել է ՀՀ Ազգային ժողովի կարողությունների զարգացմանն ուղղված «Նոր Հայաստան` ժամանակակից խորհրդարան» ծրագրի կարեւորությունը, որն իրականացվել է Շվեդիայի աջակցությամբ: