Բաժանորդագրվեք araratnews-ի  տելեգրամ ալիքին։

Աղը, ավելի ճիշտ՝ դրա մեջ պարունակվող նատրիումը, շատ օգտակար սննդանյութ է։ Նատրիումի ցածր մակարդակը հանգեցնում է շրջանառվող արյան ծավալի նվազմանը, ինչը կարող է ունենալ լուրջ, երբեմն մահացու հետևանք առողջության համար:  Եվ հակառակը, աղի ավելցուկը կարող է հանգեցնել արյան ճնշման բարձրացմանը և սրտանոթային հիվանդությունների զարգացմանը:

Այովայի համալսարանի գիտնականների նոր հետազոտությունն առաջին անգամ հայտնաբերել է աղի հանդեպ ախորժակի համար անհրաժեշտ նեյրոնները:

Հետազոտության արդյունքները հրապարակվել են JCI Insight ամսագրում:

Գիտնականներն իրենց հայտնագործությունն արել են՝ ուսումնասիրելով ալդոստերոնի ազդեցությունը՝ հիմնական հորմոնը, որը վերահսկում է նատրիումի մակարդակը: Ալդոստերոնը սովորաբար արտադրվում է, երբ օրգանիզմում հեղուկի ծավալը (ներառյալ արյան ծավալը) փոքր է, օրինակ՝ առանց բավականաչափ հեղուկ խմելու քրտնարտադրությունից հետո, արյան կորստի, փսխումով կամ փորլուծությամբ ուղեկցվող հիվանդության ժամանակ:

Ալդոստերոնը ստիպում է երիկամներին և այլ օրգաններին պահել նատրիումը, որն օգնում է օրգանիզմում պահպանել հեղուկի անհրաժեշտ մակարդակը:

Սակայն ալդոստերոնի չափազանց բարձր մակարդակի դեպքում, որը կոչվում է առաջնային ալդոստերոնիզմ, արյան ճնշումը կարող է բարձրանալ վտանգավոր մակարդակի:

Ալդոստերոնիզմը պատճառ է դառնում հիպերտոնիայի  արյան բարձր ճնշում ունեցող բոլոր հիվանդների 10%-ից 30%-ի մոտ, իսկ կաթվածի, սրտի անբավարարության և սրտի աննորմալ ռիթմի վտանգը երեք անգամ ավելի բարձր է այս հիվանդների, քան հիպերտոնիայով այլ հիվանդների մոտ, թեև անհասկանալի է, թե ինչու:

Գիտնականների թիմը կենտրոնացել է ալդոստերոնիզմի չգնահատված կողմի վրա՝ ավելի շատ աղ ուտելու հակման վրա:

Գիտնականներն առաջին անգամ հաստատել են, որ մկների սննդակարգում նատրիումի պակասը մեծացնում է ալդոստերոնի արտադրությունը և աղի սպառումը։ Այնուհետև նրանք պարզել են, որ մարդիկ նույնպես HSD2 նեյրոնների փոքր պոպուլյացիա ունեն ուղեղի ցողունի նույն հատվածում, ինչը ցույց է տալիս, որ նույն նյարդային շղթան կարող է վերաբերել ալդոստերոնի բարձր մակարդակ ունեցող մարդկանց:

Ընդհանուր առմամբ, ստացված տվյալները վկայում են, որ ալդոստերոնն ազդում է HSD2 նեյրոնների չափազամց փոքր պոպուլյացիայի վրա (մկների մոտ կա մոտավորապես 200 HSD2 նեյրոն, իսկ մարդկանց մոտ՝ 1000), առաջացնելով շատ յուրահատուկ վարքագիծ, որը կապված է նատրիում փնտրելու և սպառելու հետ:

Ուսումնասիրության արդյունքները ցույց են տալիս, որ նատրիումի հանդեպ ախորժակի մեծացումը կարող է լինել HSD2 նեյրոնների միակ կենտրոնական գործառույթը: