Բաժանորդագրվեք araratnews-ի տելեգրամ ալիքին։
Կառավարությունը հրապարակել է Հայաստանի Հանրապետության ժողովրդագրական իրավիճակի բարելավման 2024-2040 թթ. ռազմավարության գործողությունների ծրագիրը հաստատելու մասին նախագիծ։
Նախագիծը միտված է սահմանելու ՀՀ ժողովրդագրական իրավիճակի բարելավման ռազմավարական նպատակների իրականացման կոնկրետ գործողությունները։ Այն բխում է ՀՀ կառավարության 2024 թվականի հոկտեմբերի 17-ի N 1641-Լ որոշմամբ հաստատված ժողովրդագրական ռազմավարությունից։
Ծրագրի միջոցով նախատեսվում է ստեղծել բարեկեցիկ միջավայր՝ նպաստելով ընտանիքի զարգացմանը, նվազեցնել մահվան ռիսկի գործոնները և խթանել առողջ կենսակերպ, ապահովել ակտիվ և արժանապատիվ ծերություն, նվազեցնել էմիգրացիան և խթանել բարձր որակավորում ունեցող մարդկային կապիտալի պահպանումն ու ներգրավումը։
Հայաստանի ներկա ժողովրդագրական վիճակը՝ ներառյալ ծնելիության նվազումը, մահացության ցուցանիշների աճը, ծերացման գործընթացները և միգրացիոն խնդիրները, հրատապ են դարձնում այս ծրագիրը։ Ծրագրի ընդունմամբ ակնկալվում է ոչ միայն մեղմել առկա խնդիրները, այլև ապահովել բնակչության երկարաժամկետ և կայուն զարգացում։
Նախագծի իրականացումը չի պահանջում լրացուցիչ ֆինանսական միջոցներ, իսկ ծախսերը կատարվելու են ՀՀ պետական բյուջեի և օրենսդրությամբ չարգելված այլ միջոցների հաշվին։
Ծրագիրը համահունչ է ՀՀ կառավարության 2021-2026 թվականների ծրագրի «Մարդկային կապիտալի զարգացում» բաժնի նպատակներին և «Հայաստանի վերափոխման ռազմավարություն 2050» ծրագրի ժողովրդագրական խնդիրների լուծման ուղղություններին։